Chentu dies de incumpetèntzia?

de Massimeddu Musu Cireddu

Sunt passadas giai prus de 100 dies dae s’intrada a su guvernu de sa Sardigna de sa giunta Pigliaru e forsis est lòmpidu su tempus pro donare is primos giudìtzios. 100 dies sunt tropu pagas pro donare inditos, eis a nàrrere, ma una giunta chi s’est presentada comente fata dae “persones cumpetentes”, “espertos” e fintzas “professores” (chi duncas non ischint isceti risòlvere problemas ma sunt fintzas bonos a imparare is solutziones a is àteros) e is problemas de sa Sardigna aici urgentes non permitint a nissunu, guvernante o osservadore, de pèrdere tempus isetende chi is problemas si risolvant a solos.

E duncas andamus a bìdere ite at fatu custa giunta in contu de limbas natzionales e de sardu. Pro primu cosa at numenadu un’assessore a sa cultura, Claudia Firino, chi at ammìtidu issa etotu ca non “ischiat meda” de sa chistione linguìstica e ca teniat bisòngiu de tempus pro cumprèndere totus is positziones e is chistiones abertas. Firino, chi duncas tenet cumpetèntzias a pitzus de is àteros temas de s’assessoradu suo, at seberadu in su staff suo personale Giuseppe Dessena e Cinzia Isola, chi non paret tèngiat cumpetèntzia ispetzìficas a pitzus de sa chistione linguìstica (is malos narant ca unu est in cuota Piras e s’àtera in cuota Uras, cumpetèntzias bastantes pro s’assessoradu). Duncas is chistiones sunt duas, o Firino pensat ca non bisòngiat a tènnere cumpetèntzias ispetzìficas pro risòlvere sa chistione linguìstica sarda, o forsis dda cunsìderat una chistione de pagu importàntzia.

Comente s’ischit, de àtera manera, sa magiorantza in cussìgiu regionale no at aprovadu sa norma chi permitiat a su diretore de su servìtziu limba sarda Corongiu, chi dae 8 annos sighiat sa polìtica linguìstica de sa RAS, de sighire su traballu suo, ufitzialmente pro “chistiones burocràticas”. Su servìtziu, a oe, est ancora sena una ghia e intre is ùnicos chi diant a pòdere pigare cussu postu (is dirigentes de rolu de sa RAS) non paret chi bi nde siant medas cun cumpetèntzias a pitzus de sa polìtica linguìstica.

E duncas ite abarrat de sa polìtica linguìstica de sa giunta Pigliaru e de sa magiorantza dipendentista chi oe guvernat sa Sardigna, pustis de sa promissa de s’assessora de s’informare e de portare su sardu in is iscolas? Abarrat su fatu chi is progetos betzos sunt andende a iscadèntzia e de noos non si nde bident, abarrat su fatu ca su servìtziu limba sarda est sena de ghia e sena de unu programma, abarrat su fatu ca su sardu est torradu a èssere una chistione pro chertare e si ghetare ludu de pare a pare.

A mie mi paret chi a palas de totu custa situatzione non bi siant problemas ne de cumpetèntzias tècnicas e ne de pinnicas burocràticas. B’est imbetzes una crara voluntade polìtica de serrare un’istajone, chi fintzas cun faddinas e problemas, est renèssida a portare a in antis s’idea de su sardu che a una limba normale e ufitziale. Sa voluntade polìtica est cussa de torrare a su sardu folclorìsticu, est cussa de torrare a donare dinare a s’universidade italiana pro fàghere progetos in italianos chi serbint isceti pro donare dinare a professores chi non ischint nemmancu chistionare su sardu.

E non ispantet su fatu ca a s’imbrutare is manos is professores ant a pònnere is autonomistas (chi oe si faghent nàrrere “sovranistas”) o fintzas carchi “amantiosu” de su sardu. Dae semper is meres ponent is tzeracos a in antis, de manera chi issos potzant nàrrere de non de ischire nudda e chi non b’intrant nudda.

Custos sunt is primas 100 dies de guvernu Pigliaru in contu de sa chistione linguìstica, e chi sighint de aici, a parre meu, ispero fintzas chi siant is ùrtimas.