de Mauro Piredda
Sa polèmica est ùtile ca serbit a nche artziare su livellu de sa dibata e de sa cussèntzia. Cando però amus in antis de nois prendas che a sas chi sighint, tocat de rispòndere cun sos mèdios nostros lassende sos autores che a sos molentes in su logu in ue l’ant iscritu. Custa est una classificatzione de sos partigianos de sa Lsc fata dae unu partzidore declaradu chi faeddat de duas limbas.
1) Is primus funt is complessaus…..creint ca su Log/Nuo. est su mellus, poita ca ddu ant nau unus strangius lompius in Sardinnia in ‘800!!!
Risposta) A pensare chi in su ditzionàriu de unu nòdidu istràngiu non b’at nemmancu una definitzione de tenore, in su sensu de su sistema de cantu. Su “tenore” chi b’agatamus est un’àtera cosa e paret chi manchet in sos chi si ponent a fàghere custas classificatziones (chi non naro chi sunt ofensivas ca est dare valore a chie la faghet). Torrende a su tenore, a su cantu a tenore, sos de su cabu de giosso chi lu reconnoschent che a cantu sardu e non che a cantu logudoresu non sunt tzertu cumplessados. Chie sighit a nàrrere custa tontesa aiat una ocasione, in s’addòbiu de Santa Justa, de intèndere sos campidanesos e sas campidanesas chi ant faeddadu, e su meledu de Bustianu Pilosu de su Sòtziu Tenores Sardigna.
2) Is segundus funt is chi guadangiant…Lobistas LSCistas, genti de domus editoras, portalitus de sa lingua etc.
Risposta) Chie iscriet gasi non connoschet sa gente chi iscriet in donu pro sa passione e sa punna, ignorat sos chi giughent a in antis giornales iscritos pro sa magiore parte in campidanesu arreguladu, chi b’at libros pro pitzinnos imprentados sighende “is arregulas” e pensat chi totus devat èssere fatu in càmbiu a dinare a su puntu de àere unu situ iscritu in italianu.
3) Is de tres …funt natzionalistas fora de setiu ca de sardu ndi sciint bell’e nudda, e imperant s’ideologia LSCista po afortia s’ideologia insoru, cosa ca in Sardinnia no apicigat mancu po nudda.
Risposta) Cando non si connoschent bene sas cosas si sighit a nàrrere tontesas, imbetzes de currègere su tiru. Su movimentu linguìsticu est trasversale e in intro de issu b’at natzionalistas, chie no atzetat cussa eticheta mancari siat indipendentista, e gente chi reconnoschet petzi s’esistèntzia de sa natzione sarda. In cara a custu mundu b’est finas chie non reconnoschet su cuntzetu de natzione pro sighire a nàrrere chi in aterue b’at limbas policentricas che a s’inglesu, su frantzesu, s’ispagnolu e su portughesu de àteras natziones.
4) Is urtimus funt is de cabu de susu, chi est genti normali ca bolit imperai in su scriri sa propriu lingua.
Serrada) Su de partzire sa gente in normale o nono, est una cunfirma de s’isport de custa gente chi sighit a partzire, ma finas sa mustra de su tenore impitadu pro chistionare. A l’àere totu su tempus de istare a intzertare canta gente b’at in sos àteros addòbios, de istare seghende sa matza in facebook sighende cussìgios de custu tenore: «no… io invece credo che voi siete troppo umili… dovreste entrare nel gruppo di lingue limbas ecc e fargli il culo a questi qui…». Chie at tempus e gana de lis pònnere in fatu lu fatzat, ma nos devimus ammentare chi su tempus est pagu e chi si b’at calicunu chi cheret distrùere nois devimus fraigare.
Leave a comment