Non nos brusiemus su tempus benidore

Redatzione

Pitzente Migaleddu, òmine sardu de cabale, dae semper impignadu in sa defensa de sa Sardigna, nos at imbiadu unu comunicadu de su Coordinamentu Sardu Non nos Brusiemus su Tempus Benidore – Comitados Sardos in Rete.
Nois, comente redatzione, amus detzisu de aderire a sa retza de Comitados e invitamus totu sos de su Movimentu Linguìsticu a leare parte a su Coordinamentu.

 

 

A su Presidente de sa Regione Sardigna

RECHESTA DE MORATÒRIA

Revindichende su deretu de sos tzitadinos a s’atzessu a sas informatziones e a sa partetzipatzione a sos protzessos detzisionales chi pertocant s’ambiente, sa salude, su traballu e su bonuistare sotziale (deretu ratificadu dae unas cantas normativas internatzionales, europeas e istatales), sos comitados, grupos territoriales e assòtzios de sa Sardigna impinnados in custos temas ponent a s’atentu de sos tzitadinos e de sos polìticos su chi ponimus in custos puntos:

est operende una politica industriale iscassiada chi punnat a trasformare sa Sardigna in una prataforma energètica pro progetos de isvilupu esternos a s’ìsula e in tzentru de cummèrtziu, immagasinamentu e ismartimentu de mercantzias, de fontes energèticas e de refudos produidos in aterue, finas mediante s’apoderamentu de sas mègius terras addatas a su cultivu, cun su resurtadu de nos nch’istesiare galu de prus dae sas atividades agrìculas traditzionales;

semus annotende sa inèrtzia fundamentale de sa Regione Autònoma de Sardigna in sa revindicatzione de su deretu legìtimu in sa gestione de sos sistema ìdricos, de sos impiantos idroelètricos e de àteras fontes energèticas renoàbiles esistentes, ùtiles a una produtzione energètica, chi rispetet sa salude de sos tzitadinos e sos interessos de sos operadores de su setore primàriu e de su turismu;

semus osservende comente sa polìtica vertitzìstica non partetzipada (chie est amministrende como tenet su mandadu dae in pessu su 18% de sos eletores sardos) siat a s’ispissu funtzionale a sos interessos de sos grupos de podere finantziàrios e ispeculativos chi non currispondent nudda a sos interessos de sos Sardos, favorende s’acùmulu, sa tzentralizatzione e su trasferimentu a foras de s’Ìsula de sa richesa produida, lassende petzi ruinas ambientales, sanitàrias e sotziales;

in una cunditzione de degradu ambientale e sotziale ispainadu in totue, de agressiones contìnuas a su territòriu nostru, de minetzas a sa salude nostra, semus assistende a una esclusione contìnua dae sa possibilidade de leare parte comente sìngulos e comente comunidade a su fràigu de unu modellu de isvilupu nou, a tesu dae su chi, in sos ùrtimos 50 annos, at giutu sa Terra nostra a tènnere sa primatzia negativa de regione cun s’estensione prus manna de territòriu contaminadu (445.000 de ètaras), paris cun tassos elevados de presèntzia e de mortalidade de maladias de sa gente residente, e, in contu de isvilupu sotziale, a registrare sos tassos de disocupatzione, mescamente in sos giòvanos, de sos prus artos de s’Istadu;

unu Guvernu Tzentrale “amigu” cun su D.Lgs 23 de nadale de su 2013, n. 145, cunvertidu cun modìficas dae sa L. 21 de freàrgiu de su 2014, n. 9) (in G.U. 21/2/2014, n. 14) e connotu comente Decretu “Destinu Itàlia”, at postu sa base pro unu disimpinnu sustantziale de sos incuinadores dae s’òbbrigu de bonìfica, moende dae sa sutaiscritzione de acordos de programa cun s’Istadu e sos Entes locale pro una ricunversione industriale de custas àreas, cun agiudos fiscales a càrrigu de sas comunidades e a s’ispissu indiritzadas, comente in Portuturre e in Portueiscusi, a issèberos non sustenìbiles dae s’ambiente, dae sa sanidade e dae s’economia, praticadas, manchende una atzione de bonìfica giusta e preventiva;

su matessi Decretu “Destinu Itàlia” ìmplicat chi s’Istadu est avochende cumpetèntzias chi pertocant s’ìsula nostra in su setore ambientale, comente in sa chirca de risorsas geotèrmicas pro produire energia elètrica, cun una cumpromissione possìbile de 200.000 ha ulteriores, in unu mamentu in ue sunt naschende in su territòriu sardu una cantidade istremenada de progetos de produtzione energètica tràmite biomassas, biodigestores, parcos eòlicos istremenados, campos fotovoltàicos, impiantos termodinàmicos solares mannos in àreas a vocatzione agrìculas, finas a su trivellamentu pro chircas de idrocarburos e inchinisadores noos de refudos.

PEDIMUS un’atu urgente de MORATÒRIA chi previdat

su blocu, deretu, de sas protzeduras de autorizatzione de totu sos progetos noos de impiantos de produtzione de energia dae combustione, cun sa rèvoca de sos agiudos pro sos chi esistint giai, de sos progetos pro produire energias renoàbiles non vinculados a s’autoconsumu, de sos impiantos de inchinisamentu de sos refudos e de potentziamentu de sos esistentes, a tutela de sos territòrios nostros e de sa salude nostra, in foras de sas ispeculatziones giai esistentes, in s’isetu de sa definitzione de sos Pranos Regionales pro Energia, Refudos, tutela de su Paisàgiu;

su blocu, deretu, de su Pranu Energèticu Ambientale nou aprovadu dae sa Giunta Cappellacci, e su rimodulamentu de sos PAES, rispetende sa sustenibilidade ambientale e territoriale;

sa defensa de sas prerogativas de sa RAS e s’afortimentu in matèria legislativa cuncurrente, in sa gestione de s’ambiente e de sas fontes energèticas cuntrastadas dae su Decretu “Destinu Itàlia”.

 

Comitato Medio Campidano per i Beni Comuni

Comitato Terrasana Decimoputzu

Comitato Sa Nuxedda Free Vallermosa

No Galsi Cagliari

Comitato Non Bruciamoci Il Futuro Macomer

Movimento Rifiuti Zero Sardegna

Comitato S’Arrieddu per Narbolia

Comitato per la tutela e lo sviluppo di Torre Grande/Oristano

Comitato Fuori dalle Pale Villanovaforru

Comitato Cittadini Liberi Ottana

Comitato No Chimica Verde-No Inceneritore Sassari/PortoTorres

Arci Sardegna

Isde Sardegna

ABC Planargia Montiferru

Collettivo Carraxu

Comitato Non Bruciamoci Il Futuro Cagliari

Progetto Comune Villacidro

Comitato No Megacentrale Guspini

Comitato Terra che ci Appartiene Gonnosfanadiga

No Galsi Villacidro

Comitato Nurra Dentro-Riprendiamoci l’Agro

Associazione Culturale Athenaeum2000 Decimomannu

Eutopia Turritana

Comitato Ambiente e Territorio Samatzai

Cittadini per Decimomannu

Associazione ”Nuoro – Atene Sarda”

Comitato NO Amianto Cagliari

WWF Sassari

Csoa Pangea Porto Torres

Carlofortini Preoccupati

Comitato Basso Campidano-aria-terra-acqua

Comitato No TrivelPaby Pabillonis

No al Progetto Eleonora Arborea

Presidio Piazzale Trento Cagliari

Gruppo di informazione indipendente “InBosa”

Sardegna Pulita Cagliari

Assotziu Consumadoris Sardigna Cagliari

Malerbe Alghero

Assòtziu Zirichiltaggia Cagliari

No Trivelle in Sardegna Sanluri/Villacidro

WWF Sardegna

Redatzione Limba 2.0

 

 

11 de maju de su 2014

Leave a comment