Redatzione
Mancu eris Francesco Pigliaru at faeddadu de limba sarda. Difatis, a pustis de sa prima riunione de sa majoria at torradu a nàrrere chi sas prioridades de sa Giunta sunt a torrare a organizare sa màchina regionale, a torrare a organizare, a bogare e a pònnere impare sos entes pro su chi pertocat sa revisione de sos gastos, a controllare mègius sa sanidade, a torrare bida a sos territòrios in ue sas indùstrias ant faddidu, a chircare solutziones pro su traballu e pro sa chistione de sos vitalìtzios de sos cussigeris regionales.
Sos chi s’isetaiant carchi paràula o promissa pro sa limba sarda, a pustis de totu sa cuntierra de custas dies, ant àere pensadu a sora Lella: “Annamo bbene… proprio bbene…”.
Petzi Efìsio Arbau at faeddadu a craru in un’intervista fata in Videolina, in ue narat chi “b’est s’arriscu de ispèrdere deghe annos de traballu” e chi tocat a “intervènnere a manera crara in su setore de sa limba e de sa cultura sarda e detzìdere duncas si su sardu est una limba o un’artzipèlagu de dialetos”.
Sa chida chi intrat carchi cosa in prus nd’at essire a campu, ma s’idea chi restat est chi pro Pigliaru, a dolu manu, su sardu siat prus un’anneu chi non una sienda.