de Mauro Piredda
Sa polìtica est interessada a sa limba sarda? Sa giunta ghiada dae unu chi no ischit su sardu (e nemos bi l’at pretesu, mancu sos chi su sardu l’ant chertu in sos cuncursos pùblicos pro sos dipendentes in sas comunas) at comintzadu su cras suo? In contu de limba est torrada in dae segus de paritzos annos.
Prima chistione. Sos soberanistas non s’ant a dare peruna linea a pitzu de s’istandard. Cara a duos istandard emmo, ma a unu no est possìbile. Tocat de dare atentzione a sos “mi piace” in facebook, ca meda de su chi est analizàbile in cue (in ue amus su 90% de sa dibata) colat dae s’incarcu de cussu butone. Gasi s’at a bìdere chi, a banda Zedda, su deus ex machina de RossoMori Muledda agradat (e cumpartzit) su pensu contra a s’istandard ùnicu de su magnìficu retore bosincu.
Segunda chistione. Sa polìtica no at su mandadu democràticu de prenare cale si siat bòidu. Ca nde sunt foras fortzas chi ant produidu materiale in sardu e cun propostas polìticas a pitzu de sa limba (Fiu e Sardegna Possibile) pro mèdiu de una lege antidemocràtica e ca b’at delìberas de Giunta (in ue b’est su soberanista Maninchedda) chi no faghent a bìdere unu possìbile iscenàriu in intro de sas rigas issoro. Sa 17/20 de su 13 de maju (“Stato dell’organico e degli uffici dell’Amministrazione regionale. Misure urgenti di razionalizzazione e contenimento delle strutture dirigenziali”), moende dae su cuntinementu de s’ispesa pùblica, at a “valutare s’oportunidade de cunfirmare sos servìtzios vacantes”. E cun su retiru de s’emendamentu de Arbau (chi pro carchi linguista faeddat logudoresu ca Ollolai no est in Campidanu) su servìtziu limba sarda est vacante. S’arriscu chi bèngiat serradu b’est. E comente si b’est!