de Mauro Piredda 
A concruu de “Sa die de sa pàtria sarda”, sa festa arribada a sa de bator editziones e ammaniada dae su “Comitadu 28 de abrile”, b’at àpidu eris a borta de die una cunferèntzia subra sa limba sarda. Moderada dae Lisandru Beccu de s’assòtziu universitàriu “Su Majolu” at bidu sa presèntzia de Bustianu Cumpostu (Sardigna Natzione Indipendèntzia), Luiseddu Caria (A Manca pro s’indipendèntzia) e Pedru Frantziscu (giai candidadu a guvernadore cun su Fronte indipendentista unidu) cun sas issoro relatas. Pro Cumpostu semus colados dae sa gherra contra a sa limba conduida cun s’ispada (giuta a in antis dae sos intelletuales ligados a su Pci) a sa chi oe bidet òmines frunidos de “fioretto” tzitende sos intelletuales de oe chi faeddant de duas limbas. Pro Cumpostu – chi at donadu a sos presentes una est una “bosnizatzione” de sa limba. «Pro sarvare su sardu bi cheret unu istandard» at naradu in polèmica contra a chie, cun sa còntiga de sa democratzia linguìstica, «pensat a sa musca caddina sena sarvare su caddu». «Si morit su caddu – at annantu – si nche morit finas sa musca caddina». Pro Luiseddu Caria diat èssere netzessàriu chi sa Regione mantèngiat su chi est istadu fatu finas a como. «Bi cheret unu istrumentu iscritu – at naradu – e no est beru chi s’istandard bochit sos dialetos». In s’arresonu suo Caria at annantu chi «mancat una alfabetizatzione sarda e duncas, cun gente meda chi no est avesada, est possìbile in carchi casu una iscritura prus locale pro la acurtziare a sa limba sarda comuna». Unu mèdiu cara a s’iscritura a norma, duncas. Predu Frantziscu Devias at faeddadu de sa limba sarda in sas iscolas comente chi esseret una limba istràngia e at torradu a propònnere su vìnculu pro sos mèdios de comunicatzione: «30% de limba sarda in sos giornales e in sa programmatzione si cherent finantziamentu pùblicu regionale». Una medida chi podet finas dare traballu a sos giòvanos chi ischint faeddare su sardu.
TIESI: SA LIMBA IN “SA DIE DE SA PÀTRIA SARDA”