Su 15 de capudanni, a sas 5.30 a pustis de mesudie, sa Biblioteca Universitària de Tàtari at a retzire sa presentada ufitziale de su volùmene “Figure politiche per il futuro dell’Europa”, publicadu dae sa Coppieters Foundation de Bruxelles cun s’Istitutu Camillo Bellieni de Tàtari.
S’addobiu, postu in su cartellone de sos eventos Is.Be de su 2026, naschet dae su traballu ghiadu dae paritzos istudiosos internatzionales che a Álvarez, Cobbaert, Lavra, Nasone, Rey e Vale, chi ant fatu una chirca funguda subra a sas raighinas istòricas, filosòficas e polìticas de sas ideas de autonomia e federalismu chi ant sinnadu s’istòria de s’Europa in su Noighentos.
Sa publicatzione est in tres limbas: a sa versione italiana sighint una segunda in inglesu, est a nàrrere “Political Figures for the Europe of the Future, e un’àtera in sardu, “Figuras polìticas pro su tempus benidore de s’Europa”.
Sa presentada at a comintzare cun sos saludos istitutzionales de su diretore de sa Biblioteca Universitària, Giovanni fiori, de sa presidente de s’Istitutu Bellieni, Maria Doloretta Lai e, in rapresentàntzia de sa Coppieters Fundation, de Laura Marching.
Is.Be e Coppieters presentant in Tàtari “Figuras polìticas pro su tempus benidore de s'Europa”
