Ite sutzedit si bator gremiantes istòricos s’agatant in una mesa, e intre una manu de marìglia e s’àtera, detzidint de bortulare chimbighentos annos de traditzione? Est s’idea pro su de tres vìdeos promotzionales de su progetu “Lu Sassaresu: un’isthòria ippiziari”, in essida su 6 de trìulas in su canale youtube de s’Istituto Camillo Bellieni, chi gasi promovet unu atopu culturale de importu mannu.
Martis 14 de trìulas, a sas 18, su Giardinu de s’Archìviu istòricu comunale “Enrico Costa”, in carrela Insinuazione 31, at a retzire s’addòbiu “Li Candareri – Sos Candareris in sas poesias de sos autores tataresos”.
Custu biàgiu literàriu at a èssere ghiadu dae su dotzente de limba tataresa, Mario Lucio Marras, e at a bìdere s’agiudu de sos corsistas chi ant a lèghere sos testos dedicados a sa “festha manna” de sa tzitade. S’acumpangiamentu musicale at a èssere de Bepe Dettori.
Totus sas atividades faghent parte de su progetu “Lu Sassaresu: un’isthòria ippiziari”, una faina finantziada dae sa Regione Autònoma de Sardigna pro su Comune de Tàtari cun sos fundos de sa LR 22/18 e LR 6/12 intro su Bandu TuLiS 2025-2027. Pro àteras novas imbiare un’email a istitutobellieni@gmail.com.
Leave a comment