Comintzemus cun s’ossìmoru. Comintzemus cun s’assàchiu de sas fortzas de defensa israelianas contra sa Global Sumud Flotilla, acontèssidu a su largu de Tzipru in abbas internatzionales. Assàchiu e defensa. E cun custu diamus pòdere serrare s’artìculu. Cun s’ossìmoru. Sos commandos de sa marina militare de Tel Avìv ant intertzetadu e abbordadu deghinas de imbarcatziones de sa flota umanitària direta a Gaza. Intre sos ativistas blocados e posca trasferidos a su portu israelianu de Ashdod b’at dòighi tzitadinos italianos, unu mùmeru mannu cunforma a sos trintaghimbe signalados. S’operatzione militare deretu at ingendradu reatziones diplomàticas. Su ministru de sos Afàrios èsteros Antonio Tajani (forsis sapidu chi su diritu est diritu e non finas a unu tzertu puntu) s’est ativadu in tempus pedende a Israele de garantire sa seguridade assoluta de sos tziviles interessados e sollitzitende sa liberatzione lestra de sos cunnatzionales tratentos. Si su guvernu at seberadu sa lìnia de sa cautela diplomàtica focalizada in s’amparu de sa seguridade de sos tzitadinos finas a pagu definidos provocadores, a s’àtera ala sas opositziones sunt passadas a s’atacu. Su Movimentu 5 Isteddos at tzensuradu s’acadèssidu, incurpende a sos de Palatzu de Chigi de no àere cundennadu cun firmesa su chi definit un’atu illegale de pirateria internatzionale. Su Partidu Democràticu at espressadu oriolu fundudu sollitzitende s’interventu urgente de sas istitutziones europeas pro isblocare sos acumpangiamentos càrrigos de agiudos umanitàrios. Mentras Tel Avìv amparat su blitz faeddende de provocatzione (paràulas intesas in Roma?), in sos palatzos de sa polìtica italiana s’acontèssida de sa Flotilla caentat sa crisi polìtica. Una cosa est segura: in Gaza sighit s’inferru e gràtzias a sa Flotilla nde semus galu faeddende.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment