Est tempus de festa manna pro su fùbalu sardu. Intro de pagas oras, siat sa Torres siat su Casteddu ant pòtidu gosare pro su benidore issoro in serie C e in sèrie A. Ambas sotziedades ant aporridu a sos tifosos unu fine chida chi non s’at a ismentigare. Pro su de tres annos fatu a paris, su Casteddu renessit a firmare sa sarvesa aritmètica in sa domìniga a primu de su fine campionadu, binchende de remontada su Torinu pro 2-1, in un’addobiu prenu de emotziones.
Prima de su fruschiu de incomintzu, s’aera est giai ammerada de sentimentu: s’istàdiu faghet unu saludu corale a Leonardo Pavoletti (est s’ùrtima partida sua in s’Unipol Domus) e ammentat cun amistade s’imprendidore Carlo Cogliolo, istòricu sarvadore de su clùb in su 1986. Sa partida si faghet in pigada a su de 38 minutos, cando su granata Obrador intzertat unu tiru de manca a efetu dae trinta metros chi passat che raju sa defensa de Caprile.
Ma sos ruju-biaitos de Pisacane rispondent che a un’iscuadra manna. Colada pagu ora, Esposito si furriat de incantu in s’oru de s’àrea, agatende su tiru de dereta de su paris. In su recùperu de su primu tempus, su màssimu de sa glòria: Yerry Mina insaccat de ischina dae duos passos. In sa ripresa su Casteddu resistit a su Torinu finas gràtzias a unu àbile Caprile, e a su de tres fruschios si podet fàghere partire sa festa sarvesa.
Non est de mancu sa Torres, chi in antis de sos 5 mìgia ispetadores de su “Vanni Sanna” isorvet sa chistione Bra cun unu meritadu 2-1 e si assegurat su de chimbe annos fatu a paris in Sèrie C. Fortes de sa vitòria pro 1-0 in sa partida de andada, a sos tataresos lis fiat bastadu finas unu parègiu, ma sos pitzinnos de Greco ant chèrfidu onorare sa sarvesa cun sa vitòria.
A mòvere sa partida est Sorrentino a su de 34 minutos cun una corfada de conca in subra de un’un’imbentu de Zecca. In sa ripresa, a pustis de unu palu tentu dae Sorrentino matessi, bi pensat Di Stefano a su de 64 minutos a tancare sos giogos: firmat sa bòcia in s’àngulu de s’àrea e iscudet a filu de palu pro su de 11 tzentros de s’istajone. Su gol de su Bra cun Brambilla in su recùperu serbit a pagu. Sa Torres binchet, cumbinchet e si mantenet istrinta sa categoria a sa fine de una istajone chi, in su girone de furriada, l’at bida tzucare a passu de playoff. Sa Sardigna de s’isport podet èssere cuntenta: sas iscuadras printzipales abbarrant in sas sèries prus artas.
Bobore Taras
_______________________________________________________________________________________
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment