Su clima polìticu in Malta est prus caente de su tempus istiale chi est intrende. Su 30 de maju at postu sole a die intrea e temperaturas prus chi no artas, mescamente in sos sègios, ue s’ant a acumprire sas operatziones eletorales de custa cramada antitzipada. Su mandadu naturale de sa legisladura deviat iscadire annoas, su 2027, ma su primu ministru Robert Abela, in cherta de unu mandadu populare nou e prus forte, at traballadu pro chi si votet ocannu. Su Parlamentu maltesu, essidu dae sas eletziones de su 2022, bidet a su presente una predominàntzia de sas duas fortzas istòricas chi dae dècadas si cuntierrant sa ghia de su paisu. In su guvernu agatamus su partidu laburista, ghiadu pròpiu dae Abela, chi detenet sa majoria assoluta de sos sègios e punnat a cunfirmare non sa vitòria ebbia ma fintzas sa tendèntzia de crèschida econòmica chi at caraterizadu sos ùrtimos annos. In su fronte opostu b’est sa fortza printzipale de opositzione, su partidu natzionalista, de orientamentu cunservadore e europeista, ghiadu dae Bernard Grech, chi si presentat a sas urnas cun s’obietivu de bortare sos pronòsticos e pònnere concruos a prus de una dècada de amministratzione laburista. Mancari chi sa polìtica maltesa siat istoricamente caraterizada dae unu bipartitismu granìticu cun su binòmiu laburistas-natzionalistas, su disafiu de su 30 maju at a bìdere fintzas sa partetzipatzione de formatziones minores comente AD+PD, nàschida dae sa fusione de sos birdes cun su partidu democràticu, chi isperant de truncare su monopòliu de sos duos blocos mannos. Sa campagna eletorale, oramai intrada in sa parte sua prus inchesa, proponet temas caentes comente sa sustenibilidade ambientale, s’isvilupu urbanìsticu e sa gherra a sa corrutzione, in unu Paisu ue sa partetzipatzione a su votu est de sas prus artas de Europa.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment