Foto leada dae su profilu X de Evika Siliņa
Su primu ministru lètone Evika Siliņa (in sa foto) at dadu oe 14 de maju sas dimissiones. Sa detzisione at duncas fatu rùere su guvernu de su paisu bàlticu. Sa càusa de sa crisi polìtica est ligada a sa gherra russoucràina.
In sos ùrtimos tempos su chelu de Letònia s’est prenu de drones chi ant fatu de sa ex repùblica soviètica unu logu de passàgiu de sas armas de sas duas natziones in cunflitu.
Sa coalitzione de Riga fiat formada dae tres partidos: su Liberalcunservadore Vienotība, est a nàrrere Unidade, su partidu Progressista e su Partidu de Birdes e Massajos.
Siliņa, esponende de Unidade, aiat chertu sas dimissiones de su ministru de sa difesa Andris Sprūds, de su partidu Progressista, pròpiu pro sa chistione de custas armas chi, fatas decollare dae Ucràina e Rùssia, andant a atacare su territòriu contràriu. Pro Siliņa su ministru non fiat prus de fidare giai chi aiat fallidu in su ruolu suo. Aiat duncas pedidu a su partidu alleadu de inditare aterunu nùmene comente ministru.
Su partidu de Sprūds però comente risposta at detzìdidu de ddi leare sa fidùtzia. Sa mossa de su capu de s’esecutivu duncas at tentu un’efetu dòmino giai chi at giùghidu a sas dimissiones suas puru.
Siliņa at decraradu: «Oe apo leadu una detzisione, chi m’est costada, ma onesta de mi dimìtere dae primu ministru. Sa prioridade mea como e semper est istada su benèssere e sa seguresa de su pòpulu lètone. Partidos e coalitziones càmbiant, ma sa Letònia abarrat. Sa responsabilidade mea pro sa gente benit in antis de totu».
A coa at agiuntu: «Mi so dimìtida, ma non rinùntzio. E non mi nch’ando».
Siliņa est nàschida in Riga e tenet baranta annos. Aiat giai tentu un’esperièntzia comente ministru in su guvernu de in antis.
Sa Letònia est bivende una tensione polìtica manna finas pro sa positzione geogràfica, a làcana cun sa Rùssia, e pro sa presèntzia in su territòriu suo de una minoria manna, una parte de bator de sa populatzione residente, de ratza russa.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment