Sa Uil Fp, sa federatzione sindacale de sa pùblica amministratzione nàschida in su 2025, at realizadu un’istùdiu a subra de sos prontos sucursos in Sardigna. Duos datos importantes essint a pìgiu: su tempus chi si depet isetare pro intrare a bisita, e sa genia de casos chi andant a su prontu sucursu.
Bisòngiat de isetare dughentos chimbe minùtiles pro intrare dae su dutore de emergèntzia. «Unos de sos datos prus artos de s’Itàlia intrea», narant su segretàriu generale regionale Mimmo Foddis, su segretàriu organizativu regionale Massimo Marceddu, su segretàriu regionale Fabio Sanna e su coordinadore regionale mèigos Giovanni Pinna.
S’àteru datu chi ispantat est chi petzi su 15% de sos malàidos chi suprit a ispidale benit ricoveradu, su 54% a s’imbesse torrat a domo cun una terapia simpre. Custu nùmeru est su chi iscòbiat su problema chi b’est in suta: mancant sos mèigos de base in sas biddas e custu cheret nàrrere chi su colu chi partzit sas chistiones graes dae cussas fitianas benit a mancu. Sos prontos sucursos, tando, si carrant problemas chi non pertocant a issos e chi faghent andare totu su repartu prus a lenu.
Un’àteru problema est chi sa menguada de sos letos in duos repartos istratègicos, che a cussos de ortopedia e de meighina interna de s’istrutura de Casteddu, lassat in fora patzientes chi ant galu bisòngiu de contivìgiu, e chi diant dèpere èssere ricoverados, e chi duncas a s’ispissu depent torrare, ca no sunt sanados de su totu, o peus ca li sunt pigados problemas noos.
Sa solutzione chi proponet su sindacadu est sa matessi chi in medas sunt nende, ma chi agatat istorbos mannos: prus mèigos de su territòriu, prus logu in sos repartos e prus dutores. Ma non b’at prus gente: prima de totu ca in medas fuent dae un’Istadu chi pagat pagu e chi ponet in situatziones de traballu complicadas, a pustis pro sa cuncurrèntzia de su setore privadu, ma fintzas pro una crisi demogràfica chi est corfende male sa Sardigna.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment