Sa de ses editziones de sa Maratona de videopoesias in limbas de minorias at bidu finas a como sa publicatzione prus de 80 cumponimentos poèticos in limbas indìgenas o minorizadas. A dd’organizare est su Euskal-PEN.
Intre sos idiomas protagonistas de custa initziativa, faghent a ischire sos organizadores, ddoe sunt s’anindilyakwa, una limba aborìgena de su Territòriu de su Nord, in Austràlia, su kalaallisut de Groenlàndia, su livone, limba fìnnica de su Golfu de Riga, s’hupa, limba de sa famìllia athabaska de su pòpulu omònimu de su nord de sa Califòrnia, su selk’nam, limba de sa Terra de su Fogu faeddada a dies de oe dae una persone ebbia.
A sas diferentes editziones de sa Maratona de poesia finas a como ant partetzipadu prus de 350 cumponimentos.
S’Euskal Pen est s’afiliadu bascu de su PEN (acrònimu de Poets, Essaysts, Novelists) International, assòtziu de iscritores fundadu in Inghilterra in su 1921. A pustis de tentativos durados pagu tempus de istituire sa filiale basca, su primu in su 1950 e su segundu in su 1987, dae su 2004 s’Euskal Pen est garantende continuidade a s’initziativa, cun s’ammissione a su PEN International in su mese de abrile de su matessi annu.
Sas poesias ddas ant carrigadas in sas piataformas Facebook, Youtube, X eBlueSky.
S’iscadèntzia fiat in freàrgiu ma s’organizatzione at detzìdidu de cuntzèdere una pròroga: ddo’at tempus finas a istechida pro imbiare su materiale. Sa poesia cheret mandada in formadu panoràmicu, sena de editing, e su vìdeu depet durare dae trinta segundos a unu minutu e mesu. In prus cheret mandadu su testu in limba originale e cun una tradutzione. S’indiritzu a in ue imbiare sa poesia est pen.tlrc@gmail.com.
A chie est interessadu podet iscrìere pro tènnere informatziones a Urtzi Urrutikoetxea, semper a s’indiritzu de posta eletrònica pen.tlrc@gmail.com.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22