CASTEDDU. Una sentèntzia ràntziga che fele, de cussas chi lassant su sinnu: su Casteddu sàbadu est rutu in domo contra a s’Udinese pro 0-2, perdende su chi fiat dèpidu èssere su “match point” ùrtimu pro abarrare in Sèrie A. Sos ruju-biaitos de Pisacane ant faddidu gasi s’apuntamentu cun sa sarvesa matemàtica. Sos friulanos ant giogadu detzisos e sena piedade, e ant istratzadu sos sardos in su segundu tempus cun sas retes de Buksa e Gueye.
Sa partida, incomintzada suta a sas mègius uras e ghiada cun gosu dae sos sardos pro tempus meda, agabat cun sa bìnchida frita e ispantosa de s’iscuadra de Kosta Runjaić, capatze de aguantare a s’arrocu retzidu dae sos meres de domo, e de iscudere corfos pretzisos in su momentu de pressadura prus forte. Su Casteddu partit detzisu, tragiadu dae su calore de s’Unipol Domus, dae sos imbentos de Esposito e dae sa fortza de Mendy. A su 32′ su fatu chi diat pòdere mudare sa gara: s’àrbitru Dionisi assignat unu rigore a su Casteddu pro unu tocu de manu de Karlström, ma a pustis de àere mutidu su VAR, detzidet de annullare sa punitzione màssima. Su primu tempus agabat 0-0, cun su Casteddu chi màstigat fele pro sas ocasiones pèrdidas dae Gaetano e Palestra.
S’incomintzu de su segundu tempus est una traschia pro sos sardos. Posca de unu palu leadu dae Zaniolo a su 50′, s’Udinese colat in antis a su 56′: Solet aporrit bene a Kamara, corfu de conca perfetu de Buksa chi non perdonat e faghet su 0-1. Pisacane proat a mudare sas cosas ponende fortzas friscas (Sulemana, Zappa e Albarracin), e su Casteddu rispondet cun arrennegu. A su 75′ sa bòcia de su paris colat che cosa fata: Dossena brincat de conca pro su corner, Okoye non bi la fàghet ma Karlström sarvat de manera miraculosa subra sa lìnia de porta. Pagos minutos a pustis est torra sa defensa friulana a parare fronte a sas proas de Mendy.
In su finale, cun su Casteddu totu in antis, s’Udinese agatat sos tretos pro serrare su resurtadu. Davis gràtziat a Caprile a s’85’, ma a su 94′ non b’at remèdiu: Davis matessi passat a Gueye una bòcia chi depet èssere arrumbada ebbia in rete pro otènnere su 0-2 finale. A su de tres frùschios, a pustis de 8 minutos de recùperu, s’Udinese festat tres puntos de oro pro sa classìfica sua, mentres chi su Casteddu essit dae su campu lastimosu e prenu de pentimentos. Sa sarvesa no est galu segura: at a tocare de gherrare finas a s’ùrtimu alenu.
Bobore Taras
_____________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment