Sas eletziones britànnicas de su 7 maju de su 2026 nos las amus a ammentare comente su momentu chi su bipolarismu traditzionale s’est fatu a cantzos. Sa chi deviat èssere una proa de metade de mandadu pro su guvernu de Keir Starmer s’est trasformadu in una ritirada disastrosa pro sos laburistas, interessados dae un’undada de discuntentu chi at torradu a disegnare sas làcanas de su poderiu locale e natzionale in totu su Regnu. Su tzocu prus mannu arrivat dae su Galles, ue su Welsh Labour at retzidu una surra chi non b’at ammentu, perdende s’egemonia chi teniat dae prus de unu sèculu. Plaid Cymru, ghiadu dae Rhun ap Iorwerth, est como su primu partidu in su Senedd, su parlamentu loclae, aberende un’era noa pro su natzionalismu gallesu. Ma s’”unda de urtu” mera e sìnchera est sa chi tenet su nùmene de Reform UK: su partidu de Nigel Farage at intregadu surra manna a sos partidos traditzionales in sas baddes industriales, ponende·si comente segunda fortza polìtica gallesa e conchistende chèntinas de sègios in sos cussìgios comunales inglesos. In Iscòtzia, su SNP de John Swinney si cunfirmat primu partidu in su parlamentu de Holyrood, ma sa sua no est una vitòria totale. Sena sa majoria assoluta e cun unu Labour iscotzesu in afannu, su futuru de s’indipendentismu abarrat ligadu a su diàlogu difitzile cun sos Birdes, ùnicos binchidores reale de s’àrea progressista. Su guvernu Starmer s’agatat como in una morsa: a dereta, sa pressione populista de Reform UK isbòidat sos cunsensos de sos Cunservadores (oramai in crisi de identidade) e de sos Laburistas moderados; a manca, sos Birdes intertzetant su votu urbanu e de sos giòvanos. Su Regnu Unidu de su 2026 no est prus unu logu partzidu in duos blocos, ma unu mosàicu prus articuladu ue sas fortzas indipendentistas e de protesta detant s’agenda.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment