Sa Sardigna conchistat unu reconnoschimentu importante gràtzias a s’alleàntzia istratègica intre territòriu e sanidade pùblica. In sa Sala de sa Protomoteca de su Campidògliu (in Roma), su Comune de Ulìana e s’ASL n.3 (sa de Nùgoro) ant retzidu s’Oscar Speciale Piccoli Comuni 2026, assignadu dae sa Rete Italiana Città Sane – OMS.
Su prèmiu tzèlebrat su progetu “Caminadores”, un’initziativa chi at ischidu trasformare a beru s’esertzìtziu fìsicu in terapia de comunidade, avalorende s’imbetzamentu ativu e sa preventzione comente pilastros de benèssere colletivu. Su chiu de su progetu est unu protocollu de meighina preventiva pensadu pro cuntrastare sas maladias crònicas, sa sedentariedade e s’isulamentu sotziale.
Comente ispiegadu dae Roberta Bosu, Diretore de s’istrutura Preventzione e promotzione de sa Salude de s’ASL de Nùgoro e redatora de su progetu, su caminu cumpartzidu no est petzi un’atividade motòria, ma un’istrumentu multidisciplinàriu chi garantit sa sustenibilidade de su sistema sanitàriu, perfetzionende sas risursas pro mèdiu de interventos primidios in contu de cronitzidade.
Sa resèssida de su modellu, chi at bidu comente ambasciadore su campione Gianfranco Zola, est testimoniada dae sa difusione lestra sua, interessende giai 32 comunes de su territòriu nugoresu. Cuntentu mannu fintzas su Diretore generale de s’Asl, Francesco Trotta, chi at sutaliniadu s’importu de una sanidade de prossimidade capatze de rèndere sos sèberos salutares prus atzessìbiles a sa populatzione in su cursu intreu de sa vida.
Su sìndigu de Ulìana, Bastiano Congiu, at àpidu manera de nàrrere comente su prèmiu reconnoscat unu sèberu amministrativu pretzisu: su de investire in sa calidade de sa vida die cun die gràtzias a sa mapadura de sas àndalas e sa ricualificatzione de sas àreas isportivas. Cun s’ativatzione imbeniente de sas Palestras de sa Salude, Ulìana punnat a si consolidare comente una “ofitzina de salude” a chelu abertu, unu modellu de longevidade ativa ue sa cura de sa persone est un’aficu colletivu e bàlidu a livellu iscientìficu.
Gianfranca Orunesu
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment