Sunt oras pagu serenas pro su contingente italianu impignadu in sa missione UNIFIL in su sud de su Lìbanu. Eris (7 de maju), a pustis de mesudie, unu mìssile est rutu in sa base de Shama, sede de su Cumandu de su Setore Ovest, chi como est suta sa ghia de sa Brigada Tàtari.
Su razu est iscopiadu intro sas làcanas de sa base, in un’ora pagu trancuilla a longu de sa “Blue Line”.
Galu non si connoschet su tretu chi at fatu su mìssile e da ue est istadu lampadu, ma in custas oras si sunt faghende sas verìficas tècnicas pro cumprèndere mezus sa dinàmica. Pro fortuna, mancari su fatu siat istadu grae, non bi sunt feridos intra su personale militare italianu. A su chi s’est ischidu finas a como, sos dannos diant èssere istados lèbios e ant interessadu prus che àteru una vetura militare chi fiat parchegiada in su giassu tzentradu.
In sos primos minutos, si fiat ispàrghinada sa boghe chi unos cantos bìculos de su mìssile fiant rutos in sa base a pustis chi los aiant intertzetados sos sistemas antimìssile israelianos. De cale si siat manera, s’est artziadu galu de prus su livellu de allerta. Unu militare italianu ebbia est istadu assìstidu dae su personale sanitàriu ca li doliat un’ogru, de seguru pro curpa de s’iscostiamentu de s’ària o dae su prùere pesadu, ma sas cunditziones suas non dant peruna preocupatzione.
Su ministru de sa Defensa, Guido Crosetto, est sighende sa situatzione ora pro ora, paris cun su Capu de Istadu Majore, su generale Luciano Portolano, e cun su cumandante de su COVI (Comandu Operativu de Vèrtize Interfortzas), su generale de Corpus d’Armada Francesco Paolo Iannucci. Sas comunicatziones cun su cumandante de su contingente italianu in Shama sunt frecuentes, pro chi potzant istare in seguresa màssima sos “Cascos Blu” impignados in unu de sos cuadrantes prus caentes de su Mèdiu Oriente.
Bobore Taras
___________________________________________________________________________________________
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment