Su tema de sa seguresa de sos giòvanos in sas prataformas digitales est diventadu una prioridade assoluta pro Meta, chi dae pagu at annuntziadu un’afortimentu significativu de sas misuras suas de verìfica de s’edade. Pro mèdiu de s’integratzione de tecnologias avantzadas de intelligèntzia artifitziale, s’azienda punnat a garantire chi cada utente potzat bìvere un’esperièntzia cunforme a sa maturidade anagràfica sua.
Su disafiu no est fàtzile, ca a determinare cun pretzisione s’edade de chie nàvigat in su web rapresentat unu de sos nodos prus cumplessos de s’indùstria tecnològica intrea. Pro rispòndere a custu bisòngiu, Meta at isvilupadu unu sistema chi bàrigat s’anàlisi de sos datos decrarados in fase de registratzione, introduende istrumentos capatzes de individuare incongruèntzias intre s’edade indicada e su cumportamentu reale de s’utente. Una de sas novidades prus rilevantes pertocat s’introdutzione de un’anàlisi visiva AI a tretu de istimare s’edade gràtzias a s’osservatzione de inditadores fìsicos generales, comente s’istrutura òssea o s’artària, sena ricùrrere a su reconnoschimentu de sa cara o a s’identificatzione personale.
Custu sistema, cumbinadu cun s’anàlisi cuntestuale de post, cummentos e biografias, diat dèvere permìtere de identificare mègius sos contos chi apartenent a chie no at galu lòmpidu trèighi annos. Contos disativados deretu in s’isetu de una verìfica formale. S’obietivu est su de estèndere custos amparos, giai ativos pro sos “Teen accounts” in Instagram, fintzas a sos iscritos a Facebook in carchi mercadu internatzionale comente Istados Unidos o Unione Europea. De prus, Meta sutalìniat s’importu de pònnere in parte sas famìlias. S’azienda est difatis ativende risursas noas pro sos genitores, oferende inditos pràticos pro dialogare cun sos fìgios in contu de sa sintzeridade in sas retes sotziales.
Gianfranca Orunesu
(Foto de Julio Lopez)
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment