Sas eletziones de su 7 maju non rapresentant petzi una proa pro su guvernu de Londra, ma sunt unu disafiu esistentziale pro sas natziones de sa Grandu Bretagna. In Iscòtzia (a nord) e in Galles (in su sud-ovest), su votu pro su rinnovu de Holyrood e de su Senedd bidet sos partidos natzionalistas impignados in una batalla pro sa re-cunfirma e s’espansione, in unu clima de intzertesa polìtica profunda. Su Partidu natzionale iscotzesu (Scottish National Party) lompet a custu addòbiu a pustis de annos de chimentos internos e intrèveros in sa ghia de su partidu. Mancari sa mèngua de cunsensos dèvida a sa gestione de sos servìtzios pùblicos e a sas inchestas giuditziàrias chi ant dadu prus chi non matana a sos pianos artos, su partidu abarrat su baluardu de s’indipendentismu. S’istrategia de su SNP est crara: trasformare su votu in unu sèberu intre su “declinu de Westminster” e s’autodeterminatzione. Sos sondàgios ammustrant una resistèntzia superiora a sas aspetativas, gràtzias mescamente a sa frammentatzione de su fronte unionista, ue sos Laburistas leant podda manna a si presentare comente un’alternativa credìbile. In Galles su Plaid Cymru (Partidu de su Galles) est vivende una fase noa de crèschida. Aprofitende de su calu de popularidade de sos Laburistas gallesos, chi guvernant in Cardiff dae deghènnios, su Plaid punnat a diventare su primu partidu o, a su nessu, su coro de una coalitzione noa. Su programma suo movet dae s’amparu de s’identidade culturale e dae una autonomia fiscale prus manna, intertzetende sa discuntentesa de sas àreas rurales e de sas baddes industriales. In custas eletziones, su Plaid no est prus petzi unu partidu de protesta, ma si proponet comente una fortza de guvernu matura, capatze de disafiare s’egemonia laburista pròpiu in contu de giustìtzia sotziale e de gestione econòmica locale.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment