«Cherimus fraigare istrumentos pro afortire e elevare sas persones, no entidades in càmbiu issoro». Comente diamus dèvere retzire custas paràulas, iscritas in unu post X dae Sam Altman sa prima die de maju, die chi ammentat sas batallas de sos traballadores? In un’època in ue s’intelligèntzia artifitziale no est prus una promissa pro unu cras ma una realidade operativa, cale diretzione leant sos faeddos de su Ceo de OpenAI?
Pro chie pensat chi sa tecnologia potzat èssere parte de unu cuntratu sotziale nou, s’automazione podet èssere bida comente unu motore potente de emantzipatzione. Bastis chi su fine ùrtimu suo siat su benèssere colletivu e non s’acumulatzione de richesa pro pagos. Si sas «entidades» mentovadas dae Altman esserent a beru progetadas pro liberare s’òmine dae su traballu alienante e ripetitivu, sas persones si diant pòdere dedicare a sa creatividade artìstica, a su contivìgiu de issas matessi e a s’istùdiu.
Ma pro chi si presentet custu iscenàriu bi cheret una mudada funduda de paradigma: sa crèschida de sa produtividade generada dae sas màchinas si devet bortare in una diminutzione de s’oràriu de traballu e in una crèschida de sos servìtzios pùblicos universales. Prus a prestu connoschimus litzentziamentos de massa pro massimizare sos profetos.
Mirende a su tempus benidore, sa tzentralidade de s’èssere umanu devet abarrare su càrdine èticu de cada innovatzione. Si s’intelligèntzia artifitziale est un’istrumentu de sustegnu, unu “copilota” de sa mente, issa podet reduire sas disagualidades e amplificare sas capatzidades individuales. Ma pro chi custa trasformatzione siat progressista a beru, est netzessàriu chi su controllu de sos mèdios tecnològicos siat democràticu e trasparente. Petzi sutraende sa gestione de s’automazione a sas lògicas de mercadu amus a pòdere garantire su chi cherimus e naramus de chèrrere cada prima die de maju.
Gianfranca Orunesu
__________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment