Cun s’impugnatzione de sa lege in contu de zonas idòneas pro sos impiantos de energia birde, l’ischiant totu cantos chi fiat chistione de isetare unu pagu de tempus pro bìdere una cuntierra intre sa Regione o una Comuna contra a un’azienda produtora de energia. E difatis a freàrgiu sa sotziedade Carbonera Wind Srl at bìnchidu unu ricurso in su TAR contra sa Comuna de Locusantu: sa firmada a su progetu eòlicu no andat bene, e tando s’impiantu si depet fàghere. Su chi in medas sunt timende est una genia de àidu in sos muros de seguresa: una bìnchida chi indita su caminu a sas àteras aziendas e, duncas, sa solobradura de onni defensa de su territòriu.
Su chi ant sustènnidu totus, dae sa Regione a sas Comunas, no est istadu mai unu nono a cale si siat impiantu birde, ma sa pedida de un’arresonu chi tèngiat in cunsideru sos bisòngios de sa populatzione: amparu de su paesàgiu e dinari a sa comunidade pro s’isfrutamentu de su territòriu. Ma sos guvernos italianos non sunt de acordu. Siat Draghi chi Meloni, ant postu e ponent sa chistione de s’energia comente apretu natzionale prus forte de sas rechestas de sos sardos.
Pro custa resone in martzu sa Presidente Todde at batidu a sos tribunales costitutzionales su cunflitu intre s’Istatutu sardu e sa lege natzionale nùmeru 4 de su 15 de bennàrgiu de su 2026 sa chi donat una libertade manna a su guvernu a subra de in ue si podent fraigare sos impiantos. Sa porfia est sighida in custas dies ùrtimas de abrile cando Todde at seberadu de andare in su Cussìgiu de sos Ministros narende duas cosas: su nono a sos progetos chi si fiant analizende e chi, si si depent bogare 6,2 Gigawat de energia birde dae sa Sardigna, est sa Sardigna chi depet seberare dae ue e comente. Su Cussìgiu at leadu tempus e s’est abertu a arresonare cun sas comunidades, ma non cheret dare su poderiu a sa Regione.
A pustis de prus de dughentos annos dae sa Die de s’aciapa, su raportu intre ìsula e Terramanna paret semper in su matessi surcu: interessos opostos e pelea intre autonomia sarda e su tzentralismu italianu. Nd’amus a essire mai?
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment