A deghennoe annos dae su mortòrgiu de Chiara Poggi, su casu si torrat a abèrrere cun unu abburotu ispantosu. Sa Procura de Pavia at dadu una furriada a sas indàgines, aprontende un’acusa chi ponet a banda sas tzertesas essidas a campu dae su protzessu: s’autore de su delitu de su 13 de austu de su 2007 non diat èssere Alberto Stasi, ma Andrea Sempio.
Sas ùrtimas indàgines de su 30 de abrile de su 2026 presentant una nova chi fàghet a trèmere. Pro sos magistrados pavesos, Sempio – amigu de su frade de sa giòvana ochida – diat àere fatu totu a su solu. Ruet duncas s’idea de su cuncursu: Sempio oe est inditadu comente a s’ùnicu autore de s’assassìniu. Su movente, segundu sa Procura, diat èssere unu refudu de Chiara a sas lusingas suas. Unu refudu chi diat àere iscadenadu sa fùria de s’òmine.
S’atu de acusa descriet s’agressione in tres momentos de malignidade frita. A primu un’atacu a sa cara de sa fèmina cun unu traste chi no est mai istadu agatadu. A pustis, su corpus de Chiara, giai mesu morta, est istadu iscostiadu acurtzu a sos iscalinos de sa chentina. In finitia, maigantos corfos mortales sunt istados iscutos a conca pro s’assegurare sa morte de sa giòvana. Sa bestialidade de sos dòighi corfos in totu, est bàrfida pro s’indagadu sas agravantes de crudelidade e de càusas fùtiles.
Sa pista noa tenet dereta efetos subra a sa vida de Stasi, chi oe est in regìmene de semilibertade. Gràtzias a perìtzias genèticas noas chi diant ligare su DNA de Sempio a sas trassas suta de sas ungras de Chiara, sa Procura pensat chi Stasi non siat istadu in sa domo de Chiara cando l’ant morta. Sos avocados suos sunt giai prontos a pedire sa revisione de su protzessu cando ant a otènnere totus sos atos.
Sempio, isetadu pro s’interrogatòriu de su 6 de maju, negat cale si siat neghe. Sa defensa sua pensat chi su “movente passionale” siat “inconsistente”, e annanghet chi non b’at àpidu mai tratàntzia fitiana cun sa vìtima. Como restat de cumprèndere comente sa magistradura at a brincare su muru de sos “sette indìtzios” chi ant batidu a sa cundenna de Stasi in su 2015. Su caminu cara a sa beridade est galu in pigada.
Bobore Taras
____________________________________________________________________________________________________
Attività realizzata col contributo della Regione Sardegna – IMPRENTAS 2025/2026. LR 22/2018, art. 22