Carburante prus caru, s'allarme de su Mit

Sa continuidade territoriale sarda torrat a trèmere suta a sa pressadura de su caru-carburante e de sas dinàmicas geopolìticas internatzionales. Su vitze-pretzidente de su Cunsìgiu e ministru de sas Infrastruturas e de sos Trasportos, Matteo Salvini, at faeddadu in sa question time a sa Camera pro nos dare a ischire cale siat su puntu de sa situatzione chi podet fàghere dannos medas a sas busacas de sos tzitadinos de s’ìsula.

Su coro de s’arresonu at pertocadu su mantenimentu de sos prìtzios pro sos residentes. «Unu tema de importu mannu — at ispiegadu Salvini — est cussu de sos bolos sugetos a òneres de servìtziu pùblicu. Pro custos tocat a su Ministeru, de acòrdiu cun sas Regiones e cun s’Enac, s’autorizatzione de possìbiles variatziones de sas tarifas». Finas a oe, su Guvernu est renèssidu a fàghere de iscudu, impedende chi sos rincaros de sos costos operativos aerent causadu s’aumentu deretu de sos billetes.

Sende gasi, su Ministru at imbiadu unu avertimentu craru: «Amus blocadu finas a como s’aumentu pro sos residentes, ma in su campu de sa normativa e de sos vìnculos europeos no amus a renèssere galu pro meda a sustènnere sas cumpagnias aèreas». Sas cumpagnias, difatis, sunt pedende cun fortza su rincaru pro parare fronte a costos de gestione semper prus graes.

Non siat bastante su tema de sos prètzios, abarrat arta s’atentzione subra a sa disponibilidade de su carburante àviu (Jet A1). Sas cuntierras de s’Istrintu de Hormuz, agravadas dae sa gherra chi bidet sa partetzipatzione de s’Iran, ant pesadu timores pro blocos operativos possìbiles. Subra a custu fronte, Salvini at chircadu de rassegurare s’Àula: «Sas riservas italianas garantint operatividade prena a su mancu finas a totu maju. Non semus in antis de un’emergèntzia chi ponet in perìgulu sos bolos in su tretu de tempus curtzu».

Bobore Taras