Est nùmene nòdidu su de Darya Majidi, esperta de informàtica, imprendidora e autora de su libru “Donne 4.0”. Figura de riferimentu in s’àmbitu de s’innovatzione e de s’intelligèntzia artifitziale, lompet a s’ìsula sarda pro ispirare sas generatziones noas cara a sas professiones de su benidore.
Sa dotora Majidi at a èssere sa protagonista de primore de su tziclu de addòbios prevìdidos dae su Progetu Margherita, un’atzione de sistema de importu mannu dedicada a sa grandu astrofìsica fiorentina Margherita Hack.
Sa mission? Cumpartzire cumpetèntzias tècnicas e traballare pro remòvere sos istereòtipos de gènere chi, galu oe, lìmitant sa partetzipatzione de sas istudiantes in sos àmbitos iscientìficos e tecnològicos.
Su giru de sa testimonial comintzat in Nùgoro sas dies de su 4 e de su 5 de maju, ue s’at a addobiare cun sos istudiantes de sas iscolas partner de su territòriu: lunis in sos locales de s’Istitutu de istrutzione superiore “Francesco Ciusa” de carrera de Costitutzione (ue ant a partetzipare fintzas sos pitzocos de su Litzeu clàssicu “Giorgio Asproni”); semper lunis in s’àula magna de su Litzeu iscientìficu e linguìsticu “Enrico Fermi” de carrera de Veneto; martis in s’Istitutu tècnicu cummertziale “Gian Pietro Chironi” de carrera Toscana. Mèrcuris su 6 est imbetzes sa borta de Thiniscole, cun tapa in s’Istitutu tècnicu cummertziale pro geòmetras “Luigi Oggiano” de carrera de Pietro Micca, ue at a acabbare custa fase de testimonias diretas cun su mundu de sa chirca e de s’impresa STEM.
Su Progetto Margherita at s’obietivu de fàghere crèschere sa platea de sos istudiantes de sa Provìntzia de Nùgoro, prontos a printzipiare percursos professionales in àmbitu iscientìficu, impreende metodologias a s’avanguàrdia. Sas atividades didàticas propostas pertocant difatis tecnologias innovativas comente sa realtade virtuale, sa robòtica e s’intelligèntzia artifitziale oferende un’impostatzione laboratoriale e immersiva chi ìntegrat s’oferta iscolàstica traditzionale.
In prus de sos addòbios iscolàsticos, su calendàriu previdet unu momentu de grandu impatu indiritzadu a sa tzitadinàntzia intrea. Su merie de martis su 5 de maju, dae sas 15 in sos locales de su Spazio Palc de carrera de Lombardia in Nùgoro, b’est sa projetzione de su film “Il diritto di contare”, pellìcula chi contat s’istòria de fèminas istraordinàrias chi ant signadu su progressu de sa NASA derrotende ratzismu e sessismu. Posca, dae sas 17, b’est in programma sa dibata cun Darya Majidi.
Custu addòbiu pùblicu punnat a pònnere in parte non sos giòvanos ebbia, ma fintzas famìlias e comunidades locales, promovende una visione positiva e inclusiva de sas carrieras STEM pro cuntrastare su gap de gènere presente in sa sotziedade.
Su Progetto Margherita est gestidu dae sa Lariso Cooperativa Sotziale Onlus in collaboratzione cun s’agentzia formativa Formatica Scarl.
Su progetu est seletzionadu e sustènnidu dae su Fondo per la Repubblica Digitale – Impresa sociale, partenariadu intre pùblicu e privadu sotziale (Guvernu e Assòtziu de Fundatziones e de Càscias de rispàrmiu – Acri), chi si movet in s’àmbitu de sos obietivos de digitalizatzione prevìdidos dae su PNRR e dae su PNC e est alimentadu dae versamentos de sas Fundatziones de orìgine bancària, chi lis reconnoschent unu crèditu de imposta.
Su Fundu seletzionat e sustenet progetos de formatzione e de inclusione digitale pro partes diferentes de sa populatzione; s’obietivu est su de valutare s’impatu de sos progetos formativos sustènnidos e de replicare prus a mannu sos chi resurtant sos prus eficatzes a tales chi s’ofèrgiant sas mègius pràticas a su Guvernu, pro chi custu las potzat impreare in sa definitzione de polìticas benidoras natzionales.
Pro info prus a minudu est possìbile a consultare su situ fondorepubblicadigitale.it.
Gianfranca Orunesu
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22