Creación Musical en Lenguas Originarias est unu libru dedicadu a sa mùsica in sas limbas indìgena de Mèssicu. Su progetu est coordinadu dae José Antonio Flores Farfán, professore de su CIESAS (Centro de Investigaciones y Estudio Superiores en Antropología Social) de Tzidade de Mèssicu, paris cun Nicolás Hernández Mejía, issu puru de su CIESAS.
Flores est finas su coordinadore de su Acervo Musical de Lenguas Indígenas e de su progetu Revitalización Linguistica a través del arte.
S’operatzione cheret favorire su recùperu de sos idiomas minoritàrios de s’istadu nordamericanu, massimamente in ocasiones pùblicas. Ddo’at finas una mirada a sa situatzione de su maori in Nova Zelanda.
Sa publicatzione est essida pro more de sa collaboratzione intre CIESAS, Generalitat de Catalunya, Ediciones del Lirio, Linguapax, istitutzione cun sede in Bartzellona nàschida a pustis de un’initziativa de s’UNESCO in su 1987, e s’ambasciada de sa Nova Zelanda. S’ocasione fiat sa nàschida de sa dècada de sa limbas indìgenas, dae su 2022 a su 2032, decrarada dae s’UNESCO.
Su libru regollet sos interventos de artistas chi faeddant e cantant in mixe, incruidu s’ayuujk, náhuatl, mazahua, maya e mixtecu, chi ant faeddadu de sas esperièntzias issoro a livellu linguìsticu e personale. In prus ddo’at artìculos acadèmicos e anàlisis subra sa situatzione de sas limbas minoritàrias in Mèssicu .
Comente progetu parallelu est essidu finas unu discu, Creación Artística Originaria, cun cantzones in unas cantas de custas limbas indìgenas. Sos artistas chi ant partetzipadu a sa produtzione sunt María Reyna, su Trío Eiyxóchitl, formadu dae Pablo Reyes García, Fernando Corona e Diana Karina Flores, Martín Cabrera Posada, César Antúnez, in arte Mixe Represent, Jesús Cristóbal Pat Chablé, in arte Pat Boy, Celerina Sánchez e Daniel Ixcateco.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22