Sas dies coladas a s’aeroportu Ben Gurion de Tel Avìv b’at arrivadu 240 membros de sa comunidade indiana Bnei Menashe. Sos primos de unu nùmeru prus mannu, Est duncas comintzada in forma ufitziale s’operatzione “Wings of Dawn”, “Alas de s’arbèschida”. Acòllidos cun banderinas e kippah frunidas dae su Ministèriu de s’integratzione, custos tzitadinos indianos sunt sos protagonistas de unu contu ufitziale chi faeddat de sa “torrada a domo” de – narant – una de sas deghe tribù ispèrdidas de Israele dae su disterru de 2.800 annos a como, ma chi cuat obietivos polìticos prus arraighinados in su tempus presente. Su progetu, finantziadu dae su guvernu israelianu cun 90 milliones de shekel (unos 30 milliones de dòllaros), punnat a importare 6mìgia membros de sa tribù intro su 2030. Mancari sa narratzione religiosa colleghet sos Bnei Menashe a su patriarca Manasse – una rèntzia mai cunfirmada dae sas proas genèticas ma reconnota dae su rabbinadu su 2005 – sa finalidade pràtica de s’operatzione paret de natura istratègica. A un’ala si cheret sostituire sa fortza-traballu palestinesa; a s’àtera si puntat a fàghere crèschere e consolidare sos insediamentos illegales chi in parte ant a èssere destinatzione finale de custos immigrados noos. E si a sos Bnei Menashe sunt garantidos sussìdios, tzitadinàntzia e diritos sotziales, sa crìtica internatzionale sutalìniat su paradossu de unu sistema chi atzèlerat s’intrada de mìgias de tzitadinos asiàticos cando chi sighint a negare su diritu a sa torrada a milliones de pròfugos palestinesos (e non faeddemus de sa giagarada de sos chi bi sunt dae domos issoro). In custu cuntestu, sa “promissa ispirituale” pro sa comunidade indiana, chi fuit dae sas cuntierras ètnicas violentas in su Manipur, est un’istrumentu funtzionale a sas netzessidades demogràficas de Israele. S’integratzione de custos colonos noos chi, de cada manera ant a dèvere acumprire a unu percursu de cunversione formale, marcat unu passu detzisivu conca a una ridefinitzione de sa cumpositzione sotziale de su paisu a dannu de sa populatzione autòctona.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment