Sunt sas amigas e in su matessi tempus sas inimigas de su web modernu. Semus faeddende de sas AI Overview de Google. Issas sunt prontas, deretu, semper, intreghende·nos rispostas in contu de cale si siat cosa cun sa seguresa de chie non tenet duda peruna. Mai. Ma torremus a sa dicotomia. Pro chie nàvigat sunt alleadas pretziosas: lestras, sintèticas, perfetas pro otènnere deretu totu su chi serbit sena si pèrdere in milli pàginas.
Pro sos editores, imbetzes, non sunt de agiudu perunu: pro more issoro su tràficu mènguat, sos clic sunt a pagu a pagu e sos utentes, cuntentos mannos, a pustis de àere retzidu e lèghidu su resumu bene sestadu, leant e si nch’andant sena nemmancu àere su bisòngiu o su dovere de averguare sas fontes. Ma est gasi segura sa cosa?
Un’istùdiu chi su New York Times at cummissionadu a sa startup Oumi at proadu a mesurare cantu est chi nos podimus fidare de a beru. Sos resurtados sunt agigheddu paradossales: su 91% de sas bortas sas rispostas sunt acuradas, ma petzi su 39% paret afidàbile a beru, est a nàrrere sustènnidu dae fontes sòlidas. In àteras paràulas, su bonu de sas bortas b’intzertant, ma no est semper chi ischint ispiegare su proite. Google, pro parte sua, non si ponet oriolos mannos e, belle ponende sas manos a dae in antis, nos intregat unu disclaimer chi sonat comente a una precautzione de impreu: “Sas rispostas de s’AI diant pòdere cuntènnere errores”. Un’ispètzia de “imprea·lu cun cautela” ma de casta digitale.
Peristantu sos modellos Gemini sunt megiorende: sos errores prus evidentes sunt minimados in su tempus. Làstima chi, in su matessi protzessu, si siat reduida fintzas sa cuota de rispostas bene documentadas a beru. Su puntu crìticu abarrat su de sas “allucinaziones”, est a nàrrere cando s’intelligèntzia artifitziale prenat sos bòidos imbentende·si detàllios cun fatzilidade manna. Fintzas a cando custa tendèntzia no at a èssere controllada de su totu tocat a chircare peri sas fontes e averguare cantu b’at.
Gianfranca Orunesu
(Foto de Tara Winstead)
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment