Immàgine leada dae rtvenoticias
Su prèmiu Cervantes pro su 2025 dd’at bintu su messicanu Gonzalo Celorio (in sa foto). S’onorefitzèntzia, intregada dae su Ministèriu de sa Cultura de Ispagna, andat a sos iscritores de limba castilliana chi apant cuntribuidu a arrichire s’idioma.
Celorio, 78 annos, est nàschidu in Tzitade de Mèssicu, est professore universitàriu de literatura ispanoamericana e faghet parte de s’Academia Messicana de sa Limba. At publicadu una pariga de memoriales, insajos e chimbe romanzos, chi s’ùrtimu est Los apóstatas, essidu in su 2020.
At retzidu su prèmiu oe 23 de abrile dae sas manos de su re Filipu VI in s’Universidade de Alcalá de Henares.
In s’allega ufitziale Celorio at ammentadu a printzìpiu, cunforma a sa traditzione de sa tzerimònia, a s’autore chi dat su nùmene a su prèmiu, sutaliniende sa mannesa de Cervantes e de su capolavoro suo. «Sa cosa paradossale est chi su Don Chisciote chi si rebellat a cale si siat cànone possìbile istabilit a su matessi tempus su cànone indiscutìbile de sa literadura de sa limba nostra» at naradu.
At agiuntu ca sa limba ispagnola est parte fundamentale de Iberoamèrica: «…sena de issa nen Mèssicu nen perunu paisu iberoamericanu diat àere pòdidu cunfigurare sa natzionalidade sua».
E galu: «…sa natzionalidae messicana non si nche podet istacare dae sa limba e dae sa cultura ispagnola chi sunt partes de issa» e «Mèssicu est parte sustantziale de sa chi Carlos Fuentes (Prèmiu Cervantes 1987 ndr) aiat denominadu, intzertende, su territòriu de sa Màntzia».
Pro su chi pertocat s’òpera sua at naradu ca sos libros non podet èssere classificados a intro de una genia literària ebbia, bidu ca finas sos romanzos tenet carchi cosa de insaju e de memorialìstica, massimamente sos ùrtimos tres, Tres lindas cubanas, El metal y la escoria e Los apòstatas, chi formant parte de una trilogía chi s’autore at mutidu Una familia ejemplar e chi naschent dae fatos familiares.
Su prèmiu Cervantes est nàschidu in su 1976 e dd’ant bintu gigantes de sa literadura in limba ispagnola, che a s’argentinu Jorge Luis Borges, s’uruguajanu Juan Carlos Onetti, s’ispagnolu Rafael Alberti e su cubanu Alejo Carpentier.
Celorio est su de sete messicanos chi dd’at bintu.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment