Foto leada dae progresivnabulgaria.com
Domìniga 19 de abrile sos bùlgaros ant votadu pro rinnovare s’Assemblea Natzionale. At bintu su partidu Progresivna Bulgaria, partidu de tzentrumanca. Sa lista at leadu belle su 44% de sos votos.
Formadu comente coalitzione in su mese de martzu de ocannu e comente partidu custu mese de abrile, Progresivna Bulgaria est sa creadura polìtica de Rumen Radev (in sa foto). Presidente de sa Bulgaria dae su 2017, Radev at detzìdidu, semper ocannu, de si dimìtere e de partetzipare a sas eletziones pro intrare in parlamentu.
Comente presidente aiat fatu sas partes a su pòpulu chi in su mese de nadale aiat protestadu, cun manifestatziones pùblicas, contra a sa polìtica econòmica de su guvernu, chi ant causadu sas dimissiones de su primu ministru Rosen Zhelyaskov, de su partidu de tzentrudestra GERB, e sa cunvocatzione de eletziones.
Su partidu binchidore como diat pòdere finas guvernare solu, ma tenet bisòngiu de un’alleadu pro fàghere passare sas leges, che a sas pro sa giustìtzia, chi rechedent duas partes de tres de su votu parlamentare.
Rudev tenet 63 annos e una carriera in s’aviatzione militare bùlgara. At semper fatu a ischire de èssere contràriu a sas santziones de s’Unione Europea contra a sa Rùssia. Sa Bulgaria duncas presentat como una situatzione sìmile a aterunu paisu islavu, s’Islovàchia. In Bratislava puru ddo’at una ghia polìtica de manca, su primu ministru Robert Fico, chi at semper espressadu dùbbios subra sa polìtica de s’Unione Europea, cun riferimentu particulare a sos raportos cun Mosca.
In polìtica interna Radev at fatu sa campagna eletorale contra a sa corrutzione e «pro tènnere pensiones, istipèndios, cunditziones e calidade de sa vida a livellos europeos».
In prus at chertu acapiare sa proposta polìtica noa a sa traditzione bùlgara. Difatis s’assemblea costituente de Progresivna Bulgaria dd’aiant fata in Veliko Tarnovo, capitale de su Segundu Imperu Bùlgaru e tzentru de importàntzia istòrica e culturale manna in s’istadu balcànicu.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment