No, non semus faeddende de Sardigna. Mancari sa dibata in contu de sa transitzione ecològica e de ocupatzione de sa terra diat pòdere fàghere pensare a nois, su coro de custa istòria tzocheddat in tretos caraìbicos, ue su sole no est petzi una resursa climàtica, ma s’ùrtimu isperu pro sa subravivèntzia de unu sistema elètricu male postu. Cuba est rugrende una de sas crisis energèticas prus profundas de s’istòria reghente sua, marcada dae blackout e dae una dipendèntzia belle totale dae sas tzentrales termoelètricas oramai betzas. In custu iscenàriu de oscuridade intermitente, Pechinu at detzisu de intervènnere cun vigore, trasformende s’ìsula in unu laboratòriu a chelu abertu pro sa tecnologia birde sua e consolidende un’asse polìticu chi càstiat a su futuru de sas rennovàbiles. S’alleàntzia intre S’Avana e sa Tzina no est petzi una chistione de solidariedade ideològica, ma un’operatzione istratègica pro truncare la minetza energètica alimentada dae s’embargu americanu perlongadu e dae sa mancàntzia crònica de combustìbiles fòssiles. Su pianu est ambitziosu e punnat a s’installatzione de parcos fotovoltàicos a tretu de generare prus de milli megawatt intro su 2031. Gràtzias a donatziones mannas de pannellos solares e sistemas de acùmulu cun baterias de ùrtima generatzione, su guvernu cubanu chircat de reduire su consumu de petròliu, oe tropu caru e difìtzile a l’agatare. Pro sa Tzina est un’ocasione pro esportare su modellu industriale suo in un’àrea sensìbile a beru a livellu geopolìticu, dimustrende chi sa transitzione energètica podet èssere un’istrumentu de resistèntzia contra a sas santziones internatzionales. Cando chi sas naes tzisterna leant podda manna pro lòmpere a sos portos de s’ìsula, sa lughe chi arrivat dae s’Oriente paret èssere s’ùnicu antìdotu contra a sa paràlisi econòmica. Sa transitzione conca a su solare no est duncas unu sèberu petzi ambientalista, ma una netzessidade vitale pro garantire servìtzios essentziales comente sa sanidade e s’istrutzione. Su disafiu abarrat mannu, intre fartas infrastruturales e sa netzessidade de modernizare sa rete intrea. Ma in sas ruinas de unu sistema elètricu chi non aguantat a su pesu de su tempus, Cuba at detzisu de iscummìtere in su sole tzinesu pro agatare, in fines, sa lughe.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment