Sàbadu in Milanu sa Lega de Salvini at fatu sa manifestatzione “Senza paura — In Europa padroni a casa nostra” chi cheriat èssere a s’incumintzu sa sighida de su primu addòbiu chi aiat faeddadu de “reimmigrazione” — est a nàrrere s’idea de catzare sena distintzione peruna cale si siat persone immigrada, o fìgiu issoro, chi bivet in Europa — fatu in Gallarate s’annu coladu. In pratza Duomo depiant faeddare sos polìticos de su grupu europeu de sos Patriotas e sas fortzas de sa majoria de guvernu, ma gasi no est istadu.
Salvini est abarradu a sa sola. Sa comuna de Milanu at votadu una cundenna de su palcu, fintzas cun s’agiudu de Forza Italia e Fratelli d’Italia, chi difatis no ant prus partetzipadu. Tajani at ammanigiadu in sa matessi die fintzas una manifestatzione pro s’integratzione. In prus, ghias de sos àteros partidos de sa coalitzione europea ant seberadu de no andare, ca su Summit de ocannu a pìgiu de reimmigratzione at a èssere in Portogallu e non ant chèrfidu sustènnere su segretàriu de sa Lega.
Su resurtu est istadu una pratza belle bòida, cun unu tema cambiadu, e cun parlatas a subra de cale si siat faina e problema de su Paisu. Sa punna fiat cussa de si afortiare a pustis de s’essida de Vannacci, ma est istadu su revessu.
Però non si depet pensare chi Meloni e su guvernu apant mudadu sentidu in contu de sas persones chi benint a si tramudare inoghe dae su Sud de su mundu. Difatis, in su decretu seguresa coladu custa chida a su Senadu, ant seberadu de dare unu prèmiu a sos avocados chi resessent a fàghere ghirare sos immigrados. Su problema naschet, narant unos cantos assòtzios de sos avocados etotu, ca si sustenet non chie faghet mègius su traballu suo amparende e agiudende su cliente, ma chie ispinghet s’istràngiu a si nche torrare in s’Istadu dae ue est tzucadu.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment