Sa Polònia si nch’est acurtziende semper de prus a s’atopu eletorale de su 2027, unu passàgiu chi no at a èssere una consultatzione democràtica ordinària. Su clima de tensione istitutzionale – b’at una coabitatzione fortzada intre su guvernu de Donald Tusk e su presidente Karol Nawrocki – est prus chi non caente. A pustis de annos de riformas cuntestadas e contrariformas atzeleradas, sa màchina de s’Istadu polacu s’agatat oe in una situatzione particulare, ue cada initziativa legislativa de sa majoria s’iscudet contra su muru de sos vetos presidentziales. Sos iscenàrios chi s’aberint pro annoas sunt cumplessos a beru. Sa coalitzione de guvernu devet fàghere sos contos cun sas fritziones internas intre s’ànima liberale de Koalicja Obywatelska e sas cumponentes prus cunservadoras o progressistas de sos alleados suos. Su disafiu pro Tusk at a èssere su de cumbìnchere a sos tzitadinos chi petzi una majoria prus manna de tres partes parlamentares de chimbe potzat isblocare su Paisu. A s’àtera ala, sa dereta de su Pis, torrada a bida dae sa vitòria presidentziale de s’annu coladu, punnat a capitalizare su discuntentu pro sas intzertesas econòmicas, descriende s’esecutivu comente un’entidade sutamìtida a sos diktat de Bruxelles e incapatze de guvernare. In su matessi tempus ambas duas sas partes sunt antirussas (su Pis si nch’istèsiat dae Fidesz ungheresu de Orbàn petzi pro custu) e cun sa gherra chi sighit in Ucraina perunu de sos candidados printzipales s’at a pòdere permìtere de girare de palas a s’afortimentu militare. Sa Polònia de su 2027 no at a votare duncas petzi pro unu Parlamentu nou, ma pro detzìdere si cunfirmare in forma istàbile sa via europea o torrare a unu modellu de sovranismu identitàriu. In su mentres s’architetura costitutzionale matessi paret invocare una riforma chi pòngiat fine a custa gherra de trintzea intre sos palatzos de su poderiu.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment