Foto leada dae european-security.com
In un’interventu in su canale de novas frantzesu CNews, de su 12 de abrile, Alain Juillet (in sa foto), ex diretore de sa DGSE (Direction générale de la Sécurité extérieure), sos servìtzios segretos èsteros de Frantza, at denuntziadu sos interventos de sa Cummissione europea pro cambiare su resurtadu de sas eletziones ungheresas e moldavas.
In Ungheria, domìniga passada 12 de abrile, Orban, primu ministru in càrriga, at pèrdidu contra a Magyar, issu puru de destra. Sa diferèntzia printzipale est chi Magyar at annuntziadu ca at a adotare s’èuro in pagos annos.
Juillety at naradu ca «pro su chi pertocat a Orban, est interessante meda, ca in ie, de a beru, totu s’Europa, in lìnia cun sa Cummissione Europea, est intervènnida e at interferidu in sas eletziones ungheresas».
S’anàlisi de Juillet però non s’est firmada a s’atualidade. Cun riferimentu a sas eletziones moldavas de su 2024 at decraradu: «Ma no est istada sa prima borta. In Moldàvia, cheret naradu, a prus de ogna àtera cunsideratzione, ddo’at àpidu de a beru un’iscàndalu».
Segundu issu «s’Europa at fatu de totu pro fàghere bìnchere sa candidada». Sa candidada fiat s’europeista Maia Sandu.
Sa denùntzia de Juillet, òmine de afàrios chi at tentu incàrrigos polìticos importantes in s’amministratzione de s’Istadu, no est limitada a duos casos ebbia. Ddo’at una tendèntzia a interferire in sa polìtica interna de sos diferentes paisos e a detzìdere chie podet guvernare e chie nono.
«In Brussellas non si nd’istant de influentzare su cursu de sas eletziones de paisos de s’Unione, Bulgaria incruida» at agiuntu. E custa «est una cosa de a beru mala».
Cun una riflessione caraterizada dae sa realpolitik Juillet at ammìtidu ca ddo’at semper interferèntzias e tentativos de cambiare sa polìtica de un’istadu dae foras.
Su chi Juillet sutalìniat est s’ipocrisia de un’Unione Europea chi est semper pronta a denuntziare sas interfèntzias de Istados Unidos, Tzina e Rùssia e chi tenet cumportamentos sìmiles finas cun sos istados chi apartenent a s’Unione matessi.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment