Unu pamentu isfundadu in sa crèsia de Santu Predu e Paulu de Maastricht, in Olanda, at bogadu a lughe unu segretu istòricu chi paret essire dae sa pinna de Alexandre Dumas. In su mentres de sos traballos de acontzu de su logu sàcru, sunt essidos a pìgiu sos ossos de un’òmine chi, pro sos espertos, diant pòdere èssere cussos de Charles de Batz-Castelmore, su cadderi guascone connòtu comente D’Artagnan.
S’archeòlogu olandesu Wim Dijkman, chi pro trinta annos at chircadu sa tumba de su famadu moscheteri, est cùrridu a sa crèsia posca de sa sinnalatzione de su dìaconu. Paritzos sinnales ant fatu pensare chi cust’iscoberta siat ispantosa. Su chi restat de su corpus de su militare fiat suta de s’altare, in terra cunsacrada, un’onore chi si daiat petzi a sas pessones prus importantes. In sa tumba ant agatadu una moneda frantzesa de s’època e una balla de fusile a s’artària de sas petorras.
Sos particulares currispundent a s’istòria de sa morte de su D’Artagnan beru, chi fiat mortu in su 1673 in s’assèdiu de Maastricht, in s’època de sa gherra francu-olandesa. Mancari l’apat fatu immortale su romanzu de su 1844 “Sos tres moscheteris”, su personàgiu de Dumas si fundaiat subra de sa biografia de su 1700 “Memòrias de Monsieur D’Artagnan”. Mentras chi su mitu literàriu at conchistadu su mundu peri su tzìnema, sas sèries TV e su famadu dìtzu “Unu pro totus, totus pro unu”, su logu de interru de su soldadu beru s’est pèrdidu pro sèculos.
Sos ossos sunt istados leados a unu laboratòriu ispetzializadu in Mònacu. Inoghe, su DNA bogadu dae sos ossos at a èssere paragonadu a cussu de sos erederis de sa famìllia Castelmore. “Est una iscoberta chi nos ponet emotzione, ma isetamus sa tzertesa issientìfica”, at decraradu Dijkman. Si sas proas ant a cunfirmare s’identidade, sa tumba de su de “bàtor moscheteris” at a diventare una meta de pelligrinàgiu mundiale, torrende interessu pro un’eroe chi, dae sos libros de Dumas a sas interpretatziones de Douglas Fairbanks e Pierfrancesco Favino, sighit a fàghere bisare generatziones intreas.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment