Immàgine leada dae https://mota.gov.eg
Sa rena de Egitu non finit de regalare sorpresas chi nos agiuant a cumprèndere mègius s’istòria e sa cultura de su mundu antigu.
Sos archeòlogos ant agatadu unu testimòngiu pretziosu chi permitit de ismanniare sas connoschèntzias de su tempus de sa dominatzione romana in su paisu de su Nilu.
Sa nova dd’at dada a fine de martzu su Ministèriu de Turismu e Antighidades egitzianu, chi at fatu a ischire sos resurtados de un’iscavu fatu in su triènniu 2022-2025.
In su tèmpiu de Karnak, a pagu chilòmetros dae sa tzitade de Luxor, in ue unu tempus s’agataiat Tebe, est essida a pìgiu una losa, longa unos 60 tzentìmetros e larga unos 40, de su primu sèculu p. C.
In sa pedra sunt tacadas bator figuras umanas e una sèrie de iscritziones geroglìficas. Su trastu est de su tempus de s’imperadore Tibèriu, chi andat dae su 14 a su 37 p.C. S’Egitu issara fiat provìntzia romana giai dae dècadas.
Segundu sos archeòlogos sas tres figuras diant rapresentare tres divinidades egìtzias, Ammone, Mut e Khonsu e s’imperadore romanu, bestidu de faraone. In custu modu s’autoridade polìtica fiat insertada a intro de su pantheon de sa populatzione locale. Ammone fiat su deus de sa creatzione. Mut, sa dea mama, fiat cunsiderada sa mugere de Ammone e Khonsu fìgiu issoro. Sos tres deos rapresentaiat sa chi est connota comente sa trìade tebana. Sos geroglìficos imbetzes contant de su restàuru de su tèmpiu de Amon-Ra.
Sos istudiosos creent chi sa losa fiat un’elementu architetònicu postu in una muràllia e s’iscoberta est istada fata pròpiu durante sos traballos de iscavu in su giassu de sas muràllias de Ramsete III.
Su progetu, a incuru de su Tzentru Istùdios egitzianu-frantzesu pro sos tèmpios de Karnak, paris cun su Cussìgiu Supremu de sas antighidades e su Tzentru Natzionale Frantzesu pro sa Chirca Iscientìfica, teniat s’obietivu de acontzare e torrare a pònnere su portale in s’ala nordotzidentale de su tèmpiu.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment