A pustis de un’annu e mesu de atacos a s’Europa, a sos alleados e a sa democratzia, de meses de gherras e de amparu a crìmines contra a s’umanidade Trump at criticadu Leone XIV e, tando, sa Meloni s’est furriada contra a isse, pro sa prima borta.
Meloni a pustis de s’atacu deretu de Trump a su Paba (leghe inoghe) at publicadu unu comunicadu chi fiat crìticu a manera lena contra a su Presidente USA. Sas cuntierras però sunt crèschidas e a pustis de dòighi oras, Meloni at seberadu de cunfirmare a craru s’infadu de su guvernu. Gasi però at fatu annicare a Trump chi at dadu un’intervista a Viviana Mazza de su «Corriere della Sera» chi narat cosas lègias contra a Meloni. Pro isse non tenet coràgiu, non cheret agiudare sos italianos in sa chistione de su petròliu e chi, in concruos, est una polìtica dèbile.
Sa positzione de s’Itàlia in custos meses si nch’est istesiada dae cussa sighida dae sos USA: at refudadu sa base de Sigonella a sa colada de sos aèreos prenos de bombas, in paris cun s’Europa no at chèrfidu imbiare navios de gherra in Hormuz e at proadu a intritzare acordos cun sos Paisos de su Gulfu pro barigare sos istorbos de sas bombas iranianas.
Oramai est craru chi Trump est perdende su cunsensu de sos istadunidensos, e chi sas gherras chi est aberende sunt fatende mìgias e mìgias de vìtimas inùtiles e avolotende sos mercados e sos àteros pòpulos. Nemos chi est a curtzu a isse, in domo sua e inoghe, resesset a barigare s’umbra mala chi faghet. Nemmancu Giorgia Meloni, chi est isbandonende su rolu de medianera intre sas costeras de s’Otzèanu Atlànticu.
In prus, sa duda chi su referendum est andadu male fintzas pro neghe sua sa Presidente de su Cussìgiu si l’est posta dae chidas e sa catzada de Orban lis at dadu sa cunfirma: Trump est fatende male a sa movitia niedda mundiale e est andende contra a sos interessos de cale si siat Paisu chi non siant sos USA. Cust’ùrtima cosa est normale pro unu natzionalista, e est sa contradditzione prus manna intro de s’internatzionale de dereta.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment