Setanta annos de versos, de rimas e de memòrias non sunt prus petzi un’eredidade immateriale ma, como, fintzas un’iscusòrgiu tangìbile, amparadu e prontu pro èssere tramandadu. Ca si est beru chi setanta annos a como naschiat su Prèmiu Otieri de literadura sarda, como naschet su primu “Archìviu regionale de sa poesia in limba sarda”.
Custu progetu, nàschidu gràtzias a sa sinergia intre sa Subrintendèntzia archivìstica de sa Sardigna e s’Assòtziu de promotzione sotziale “Premio Ozieri”, l’ant a presentare in forma ufitziale chenàbura su 17 abrile a sas bator de merie in sa sede istòrica de carrera de Amsìcora. No at a èssere petzi una tzerimònia formale ma su contu de unu viàgiu de recùperu longu meda: sete deghènnios de creatividade artìstica chi como sunt postos in seguresa fintzas gràtzias a su ministèriu de sa Cultura chi, su 2021, nd’at decraradu su “interessu istòricu prus chi no importante”.
E mescamente gràtzias a unu traballu sighidu de riòrdinu de testos chi como est patrimòniu pùblicu bogadu a s’ismèntigu e torradu a sa colletividade. Chenàbura, in intro de sa presentatzione, nd’ant a faeddare sos archivistas responsàbiles, su sìndigu de Otieri, sas autoridades tziviles e religiosas, sos rapresentantes de sa Subrintendèntzia e de s’assòtziu Premio Ozieri.
«S’obietivu de s’incontru – narat su segretàriu de su Prèmiu Marco Fenudi – est su de sestare sas prospetivas benidoras pro chi custu siddadu documentale immensu siat una risorsa cuncreta pro sos istudiosos, sas iscolas, sas generatziones noas e sa comunidade iscientìfica intrea». Su Prèmiu Otieri est sa manifestatzione literària prus antiga de Sardigna e una intre sas prus betzas de Itàlia. Dae su 1956 a oe custu cuncursu at dadu boghe a unu pòpulu faghende crèschere sa giai pluriseculare traditzione poètica sarda.
Gianfranca Orunesu
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment