Cun sas urnas serradas e sas ischedas ispogiadas, su resurtadu de sas eletziones ungheresas de eris nos torrat un’immagine plastica de unu paisu ue s’allega polìtica si movet ormai pro intreu in un’asse ebbia: su de sa dereta. S’èsitu definitivu assignat a Tisza (su partidu de su Rispetu e de sa libertade) su 52,8 %, cun unu vantàgiu de 14 puntos pertzentuales a dae in antis de Fidesz (su partidu de s’uscente Viktor Orbán). In sa de tres positziones sa dereta estrema de Mi Hazánk Mozgalom (movimentu Pàtria nostra) cun su 5,8%. Non b’at àpidu unu disafiu intre liberatzione e autocratzia ma un’iscontru totu cantu in intro de s’àrea cunservadora. A un’ala Orbán at traballadu pro sa “soberania natzionale” e pro una “paghe” russa in Ucraina pro blindare su cunsensu istòricu suo. A s’àtera ala Péter Magyar. S’ex insider de su sistema at fraigadu una proposta de dereta chi praghet a s’Unione europea, sena però renuntziare mai a sos valores identitàrios e cunservadorea chi ant cunsensu mannu in s’eletoradu magiaru. In fines, László Toroczkai at presidiadu s’ala sa prus estrema, faeddende de protetzione de sas làcanas e de anti-globalismu. In custu iscenàriu, sa manca ungheresa est reduida a cumparta influente pro nudda o cannibalizzata dae su votu ùtile pro Magyar. Ma sa sinistra inoghe (paga est sa diferèntzia intre sarda e italiana) mègius est posta? A un’ala b’amus una “manca” chi est manifestende totu s’entusiasmu suo pro sos resurtados ungheresos (sena nàrrere chi at bìnchidu sa dereta); a s’àtera b’amus una “manca” chi diat àere preferidu una dereta serente a su puntu de riferimentu suo a livellu mundiale (sena nàrrere chi lu est): Vladimir Putin. Beru, perdent sas isperas issoro finas sos “patriotas” Vance, Milei, Le Pen, Meloni, Salvini, Netanyahu, Abascal, Weidel e àteros pegos. Ma diat èssere ora de una mirada indipendente.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment