Sa Frantza at detzisu chi est tempus de nde la tzelare cun sa dipendèntzia tecnològica dae sos gigantes extra-europeos. S’àteru die (s’8 de abrile) b’at àpidu unu seminàriu interministeriale e in cue su guvernu at istèrridu un’istrategia ambitziosa pro pigare su controllu de sas infrastruturas informàticas pròpias.
Non diat pàrrere unu disìgiu ebbia, ca sa chi Parigi est presentende est una tabella de màrtzia operativa chi at a pònnere in parte sa màchina istatale intrea e atores industriales printzipales de su paisu. S’obietivu est craru: illiberare sa pùblica amministratzione dae sos istrumentos americanos e dae lògicas de mercadu impostas dae s’esternu.
Su signale prus forte de custa novidade lompet dae sa Diretzione interministeriale de su digitale (“du numérique”, in frantzesu) chi at annuntziadu s’abbandonu progressivu de Windows in favore de sistemas operativos Linux pro sos logos de traballu. Custa transitzione est giai in motu in entes de grandu importu comente sa Càscia natzionale de asseguratzione maladia, chi est faghende migrare sos 80mìgia dipendentes suos a un’ecosistema soberanu de messagìstica (comente Tchap), de videocunferèntzia (Visio) e de trasferimentu de documentos (FranceTransfert).
Fintzas sos datos sanitàrios de sos tzitadinos, intro de sos concruos de s’annu, ant a agatare domo in prataformas natzionales. Su pianu previdet chi cada ministèriu presentet intro de s’atòngiu un’istrategia pròpia pro sostituire software antivirus, base de datos e sistemas de intelligèntzia artifitziale cun alternativas europeas. Custa rivolutzione non punnat a sa seguridade ebbia ma, a su chi si narat, finas a trasformare s’Istadu in unu volanu pro s’indùstria tecnològica continentale comintzende dae un’alleàntzia noa intre pùblicu e privadu e dae s’amparu de sos interessos de sas aziendas frantzesas.
Gianfranca Orunesu
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment