S’Inps acrarat ite est su mentovadu Bonus Giorgetti. Cun sa tzirculare 41 de su 2026, at dadu a ischire chi est unu incentivu econòmicu dedicadu a sos traballadores dipendentes chi, mancari apant maturadu sos rechisitos pro sa pensione antetzipada, seberant de abarrare in servìtziu.
Su mecanismu no est difìtzile de cumprèndere: sa cuota de contributos previdentziàrios a gàrrigu de su traballadore, paris a su 9,19 pro chentu de sa retributzione lorda, non benit prus versada a s’ente previdentziàriu, ma benit pagada deretamente in sa busta paga.
Prima de totu si otenit unu vantàgiu fiscale, ca custa parte de intrada no est tassada e non cuncurret a formare su rèdditu imponìbile. Pro su chi pertocat sa continuidade, si podet nàrrere chi, su datore de traballu, sighit a versare sa cuota sua de contributos, garantende sa tutela previdentziària.
Si brincamus sa cuota 103, dae su 2026 s’incentivu si cuntzentrat subra chie madurat sos rechisitos de sa pensione antitzipada ordinària. Pro sos òmines bi cherent 42 annos e 10 meses de contributos. Pro sas fèminas 41 annos e 10 meses de contributos. Abarrant intro fintzas sos traballadores chi ant ammaduradu su deretu a Quota 103 (62 annos de edade e 41 de contributos) intro de su 31 de su mese de nadale de su 2025.
S’ativatzione de su bonus non est automàtica. Su traballadore depet presentare sa dimanda deretamente a s’INPS, chi at a verificare sos rechisitos. Una borta cunfirmada s’idoneidade (a de sòlitu intro de 30 dies), s’Istitutu at a comunicare a su datore de traballu sa data ufitziale da ue at a partìre s’aumentu in sa busta paga.
Pro sa Cgil, dare agiudos a chie postìtzipat su pensionamentu podet creare disegualliantzias intre a traballadores e podet èssere una cosa mala pro su bonu mantenimentu de su sistema previdentziale. E no est naradu nen mancu chi cumbenzat. Segundu su sindacadu, su guvernu in custa manera diat punnare a nche istresiare semper de prus s’edade de sa pensione, incantende sos traballadores cun un’istipèndiu prus artu, in una situatzione chi bidet s’Italia in giosso meda pro su livellu de sas retributziones cunforma a sas àteras natziones de Europa.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment