Donald Trump cheriat unu grandu reset. Non su reset econòmicu de Davos ma unu biblicu, cunvintu chi pro burrare una tziviltade millenària podiat bastare su matessi briu chi bi cheret pro nche giagarare unu cuncurrente dae unu reality. Cussa minetza iscrita a pustis de Pasca in Truth contra a s’Iran est sa fotografia de sa misèria de un’òmine chi galu b’est pagu prus de un’annu a caddu. Si su primu problema, su suo, est chi non podet nen torrare a dae in segus nen burrare sa catzada chi at iscritu, su segundu problema, su nostru, est chi non si nch’at a burrare de se. Duncas a su presente ite b’at de contare de custa gherra? Chi Washington e Tel Aviv si fiant bisende una passigiada triunfale, sende chi Mosca e Pechinu non podiant intervènnere, sende chi l’Europa b’est e non b’est. Ma custa gherra at presentadu unu prètziu prus chi no artu. Si costumat a nàrrer chi Isralele siat s’unica democratzia de sa zona, una fòrmula chi abarrat ritza finas a cando no abbaidamus ite est s’apartheid e ite significadu tenet sa pena de morte pro sos palestinos acusados de terrorismu. E puru, in custa gherra intre fanatismos sa chi nde essit vitoriosa est pròpiu sa Repubblica Islàmica gràtzias a una resitèntzia chi at postu in ghenugros s’economia mundiale petzi ammentende a totu cantos chi s’istrintòrgiu de Hormuz no est unu canale balneare. E cando chi s’Itàlia perfetzionaiat su pagu ammesturadu cun su nudda (s’òpera maistra de su “né-né”), s’Iran fiat firmu in su logu suo, prus forte de sas seguresas de chie pensaiat de binchere (e de ispèrdere tziviltades). A concruos de totu, Trump no at burradu nudda, si non sa cunvintzione maca sua de si presentare comente unu pone-paghe. Sa tziviltade chi deviat iscumpàrrere est galu in cue e como su Tycoon devet fàghere sos contos cun unu “ghosting” de s’istòria: su de una vitòria chi no est lòmpida, lassende a Teheran s’iscena e su risitu de chie at binchidu, nessi pro como, petzi abarrende firmu.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment