A sas duas de note depiat agabbare sa tziviltade iraniana, ma Trump, pro fàghere torrare abertu s’àidu de Hormuz, at atzetadu de firmare cale si siat atacu pro duas chidas. Sa gherra chi est tzucada non s’ischit de a beru pro ite e chi at fatu dannos maicantos, como si firmat pro carchi die, ma non s’ischit si at a sighire o sessare de su totu.
Custa noa at àpidu un’efetu lestru in sos mercados e in sas bursas de su mundu intreu. Su petròliu est faladu a noranta duos dòllaros a su barile, prus de binti in mancu de sas dies coladas e fintzas su gasu at menguadu meda su prètziu suo. A s’imbesse sas bancas sunt crèschidas e ant balangiadu meda. Totu paret torradu a postu, ma gasi no est.
Sas infrastruturas pro produire su petròliu in totu cantos sos Istados de su Gulfu sunt istadas corfadas e a bortas arruinadas in una manera gasi isparta chi b’at a chèrrere annos o nessi meses pro las torrare a sos livellos de prima. In prus, si s’àidu de Hormuz at a pòdere èssere suta controllu de s’Iran chi diat pòdere pedire una tassa de pasàgiu. Custu cheret nàrrere chi sos prètzios de sa benzina ant a abarrare artos pro chidas e ant a incumintzare a falare de prus cando s’at a cumprèndere cantu at a durare sa paghe e cantu b’at a chèrrere pro acontzare sa situatzione.
Si su mudìmine de sas armas at a sighire forsis non b’at a èssere prus bisòngiu de sa mutzada a sas atzisas, sas tassas a subra de su carburante, ma fintzas a cando su mercadu no assèliat su guvernu Meloni diat pòdere batire a dae in antis sa medida, chi però bogat dinari maicantu a àteros setores importantes comente sa Sanidade. Paret finamentas chi sa pasada de sas bombas at istesiadu sa possibilidades de moderare s’impreu de veturas e de àteras màchinas.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment