Unu tempus sa chida santa fiat fata de dies de mudìmene, de penitèntzia, de geunu e de meledu. Ma in s’annu domini 2026 s’est rivelada Paula White-Cain, telepredicadora in lìnia direta cun su re de sos res (su de Mar-a-Lago…ite ais cumpresu?), chi at annunutziadu s’upgrade de su dogma de su sacrifìtziu. Durante unu pràndiu de Pasca, cun sa solennidade de chie cheret bèndere unu set de padeddas miraculosas, sa cussigera ispirituale at ufitzializadu s’agiornamentu: Donald Trump comente Cristos. No. Fintzas de prus. Ca, siamus onestos, a mudare s’abba in binu est cosa galana e ispantosa, ma pro cumbìnchere milliones de eletores chi sa corona de ispinas de Nonnore no est de paragonare a sa Passione de Trump bi cheret unu talentu metafìsicu superiore. «Nemos at pagadu unu prètziu che a su chi at pagadu Vostè», at naradu tzia Pàula a su tycoon, ritzu, pagos passos in dae in segus, cun s’espressione de chie at semper pensadu chi sos Vangelos siant petzi unu precuel de sa biografia sua. A bisu de White-Cain, s’ischema est su matessi: traitoria, arrestu, acusas farsas. Su Calvàriu no est prus su logu de s’incravamentu ma un’isfilada de udièntzias peri sos tribunales. Passèntzia si sas “iscrituras sagradas” de su casu ispetzìficu faeddent de pagamentos a pornostar o de àteras fainas chi de messiànicu nudda tenent; pro sa teòloga de su Make Religion Great Again, custas sunt petzi minudàntzias tècnicas de sa Passion of the Donald. B’at chie deretu at faeddadu de blasfemia. Ma est ca forsis no at iscurtadu mai “American Jesus” de sos Bad Religion. O ca forsis no at cumpresu chi como su Maga Christ est isetende sa resurretzione gràtzias a sas eletziones de mid-term. L’abarrat una duda a tzia Pàula: si Trump est su Messia, cale apòstulu l’at a traìghere? Calicunu de su campu Maga discuntentu de sa gherra in Iran? Calicunu de sos moderados republicanos in su cungressu? A bìdere istemus.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment