Sa disocupatzione est una làstima, sas impresas chircant personale ma traballadores non si nd’agatant. S’allarme de Confartigianadu Impresas Gaddura denùntziat sa mancàntzia de manudopera cualificada. Una farta chi no est unu discumbèniu de oe, ma unu lìmite istruturale chi est firmende sa crèschida de totu s’Ìsula. Sa Sardigna s’agatat oe a cara a unu paradossu econòmicu e sotziale mai bidu in antis.
Su bilantzu tratzadu pro su 2025 est sena piedade. Sas impresas artesanas sardas aiant programmadu s’assuntzione de prus de 15 mìgia interessados, ma sunt renèssidas a cobèrrere prus pagu de sa medade de sos postos. Sa dificurtade de agatare traballadores est artziada a su 55,3 pro chentu, unu datu chi est peorende sena arressu a cunforma de s’annu coladu. Custa mancàntzia de postos de traballu non est sena dolore. Si càrculat chi su ritardu in sas assuntziones e sa mancàntzia de figuras adatas faghent unu dannu econòmicu de 206 milliones de èuros, prus o mancu, pro sas impresas piticas de s’ìsula. Non si tratat de ricavos mancados ebbia, ma de una pèrdida de competitividade chi corfit su coro de su sistema produtivu sardu.
Su datu prus feu pertocat però su capitale umanu de su tempus benidore. In su mentres chi sas aziendas chircant bratzos e concas, una parte manna de sa populatzione giòvana abbarrat a làcanas: su 21,4 pro chentu de sos giòvanos intre a sos 15 e sos 29 annos non istùdiat, non traballat e non faghet peruna àndala de formatzione. Prus o mancu unu cuartu de sos giòvanos intre a sos 25 e sos 34 annos est de su totu disimpreadu. Cun pùntas chi arribant a su 17,3 pro chentu, sa Sardigna sùperat sa mèdia natzionale de su 10 pro chentu, faghende crèschere unu inghìriu de paga cualificatzione.
Pro bortare s’andera, Confartigianadu at seberadu sa bia de s’arresonu deretu. In Gaddura, progetos chi bident sa partetzipatzione de istitutos che a su “Mossa” e a su “Panedda” de Terranòa sunt chirchende de incurtziare su tretu chi istat intre sos bancos de iscola e sos laboratòrios artesanos. Comente decraradu dae sa presidente de Confartigianadu Gaddura, Marina Manconi, sa punna est a bortare su cuntatu in relata. Tocat de mustrare a sos giòvanos su balore e s’innovatzione de s’artesanadu modernu, petzi gasi s’at a pòdere isperare de ammerare cussu bòidu chi oe costat a s’Ìsula milliones de èuros e, mescamente, su benidore de sas generatziones noas.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment