Si semus isetende s’acrèditu de s’istipèndiu, de sa pensione o de una fatura, ma fintzas de unu rimborsu, dae oe a su 6 de abrile diamus pòdere àere carchi problema. Sa cosa non pertocat nen disservìtzios bancàrios ne atacos informàticos ma “petzi” una suspensione programmada de su Target2, sa prataforma tecnològica gestida dae su sistema europeu chi permitit a sas bancas s’iscàmbiu de fundos in tempus reale.
Custa suspensione cumbinat cun su perìodu de sas vacàntzias pascales (pro impreare tèrmines iscolàsticos). Perunu problema: totu sos bonìficos ordinàrios dispostos in custas dies – est a nàrrere finas a su lunis de Pasca – non s’ant a pèrdere. Petzi abarrant cungelados e apostivigados pro chi siant elaborados e contabilizados comintzende dae martis su 7 abrile. Sos efetos pràticos de custu pasu pertocant sos tempos de retzidura de su dinari.
Su destinatàriu de unu pagamentu istandard, in custas dies mentovadas de serrada, s’at a dèvere armare de passèntzia, ca sa summa l’at a bìdere petzi a pustis. Pro intreu ma a pustis. Mancari totu custu, su blocu no est totale, sende chi b’at carchi etzetzione fundamentale chi garantit sa tzirculatzione de sa licuididade fintzas in custu perìodu de passione. Sos bonìficos istantàneos, pro nàrrere, no ant a connòschere interrutziones. Pro ite? Ca viàgiant sighende binàrios tecnològicos diferentes chi òperant a totu sas oras de cada die de s’annu (h24 diant nàrrere pro la sintetizare).
Su matessi pro sos girocontos – sos trasferimentos de dinari intre duos contos currentes abertos in su matessi istitutu de crèditu (bancàriu o postale) – e sos pagamentos fatos tràmite cartas de dèpidu o crèditu in sos puntos bèndida. Fìsicos e fintzas online. Custu pasu tècnicu est una prassi pro chi s’armonizent sas operatziones interbancàrias.
Gianfranca Orunesu
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment