Chi sa nave Msc Vega siat arribada a su portu canale de Casteddu su 24 de martzu coladu, est cosa tzerta. Ma sos ùndighi container chi depiant èssere bòidos segundu a sos documentos de gàrrigu, fint prenos de materiale siderùrgicu “dual use” (tzivile e militare), massimamente atzàrgiu balìsticu chi podiat èssere impitadu dae s’indùstria bèllica israeliana.
Sa nave, in caminu dae su Pireo a València, est istada firmada a pustis de una sinnalatzione de s’istùdiu legale Elsa Kiranmoyee Chaudhuri pro contu de s’ELSC (European Legal Support Center), s’organizatzione chi amparat sos movimentos de solidariedade cun sa Palestina. S’allerta at fatu mòvere de repente sa Capitaneria de portu, s’Autoridade de sistema portuale, s’Agentzia de sas Doganas e sa Guàrdia di Finantza. Su resurtadu? Su secuestru de sos ùndighi container pro “materiale non decraradu”.
A cunfirmare su fatu grave est su Ministeru de sas Infrastruturas e de sos Trasportos (Mit), chi at respostu a un’interrogatzione parlamentare de su Movimentu 5 Isteddos (firmada dae Antonino Iaria e dae sos cullegas sardos Perantoni e Cherchi). Su Ministeru at ammìtidu chi sos cuntrollos ant batidu a s’isbarcu fortzadu de sa mercantzia, classificada “dual use”. Como su gàrrigu s’agatat in “ammissione temporanea” in un’àrea bardiada de su portu, suta sa giurisditzione de s’Uama (s’autoridade natzionale pro su cuntrollu de sas armas). Sa sorte de sos container no est segura: si su responsàbile legale non presentat sas dimandas netzessàrias o si s’àplicat sa clàusola “catch-all”, sa mercantzia diat pòdere èssere imbiada torra dae ue este partida.
“No est una puntìglia tècnica, ma una violatzione de sa lege 185/1990”, ant decraradu sos parlamentares sardos de su M5S. “Sas dudas fiant giustificadas: sunt gàrrigos pantàsimas indiritzados a unu logu de gherra. Sa limpiesa subra a sas forniduras militares est un’òbligu internatzionale”. Sa chistione abarrat aberta, isetende chi s’Uama acraret chie siat s’impreadore finale de custos materiales.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment