Un’istùdiu, galu in isetu de publicatzione, chi su primu firmatàriu est Gianni Barcaccia, professore de Genètica e Genòmica in s’universidade de Pàdua, cunfirmat s’antighidade e s’autentitzidade de sa Sìndone e sa valididade de s’òpera de Pierluigi Baima Bollone, mortu in su 2025, chi at collaboradu issu puru a custa indàgine iscientìfica. Baima Bollone, anatomopatòlogu, aiat individuadu, giai in sos annos ‘80, rastas de sàmbene umanu, de grupu AB, in su telu de linu.
Sos anàlisis de su DNA e metagenòmicos de sa chirca, chi su tìtulu inglesu est DNA Traces on the Shroud of Turin: Metagenomics of the 1978 Official Sample Collection, giai chi est istada fata cun cantos de linu prelevadu in cuddu tempus, ant riveladu presèntzia de genias de frùtora chi ant cumintzadu a tzirculare in su Mediterràneu in s’Edade de Mesu, cosa chi diat cunfirmare chi sa Sìndone at biagiadu dae Oriente a Otzidente.
S’orìgine mediorientale de su manufatu est cunfirmada dae duos fatos. Su primu est sa presèntzia de microogranismos chi s’agatant in logos cun salinidade manna. Custu fatu torrat cun sa collocatzione de su telu in unu territòriu acanta de su Mare Mortu.
Ma sas iscobertas prus interessantes sunt sas chi pertocant su DNA umanu chi sos istudiosos ant agatadu in sa Sìndone.
Su 55,6% de sas rastas de DNA apartenet a grupos umanos originàrios de s’Oriente de Mesu e su 5,6% ebbia de s’Europa otzidentale. Sa presèntzia de s’aplogrupu H33 est de interessu mannu ca s’agatat, a dies de oe, massimamente in sa populatzione drusa. Sos drusos sunt una minoria religiosa, chi professat una moneteismu nàschidu in su de 11 sèculos dae sa currente ismailita de s’Islam e bivent intre sos istados de Lìbanu, Sìria, Giordània e Israele.
Sos drusos, comente narat s’istùdiu, cumpartzint un’òrigine genètica cun giudeos e tzipriotas e tenent acàpios, semper genèticos, cun palestinesos e sirianos.
S’àteru datu interessante essidu a pìgiu dae custa indàgine nos narat ca ddo’at unu 38,7% de rastas de DNA indianu. Custa cosa si podet ispricare cun su fatu chi su linu chi est tèssida sa Sìndone beniat dae Ìndia e chi ddo’aiat un’importatzione de linu indianu in sos territòrios de s’àrea mediterrànea. Sa paràula grega sindon, sighit s’istùdiu, chi inditaiat una calidade de linu, diat pòdere bènnere dae Sindh, unu logu de s’Ìndia connotu pro sa produtzione tèssile de custu materiale.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22