Pro sa de tres bortas de sighidu, su fùbalu italianu at detzisu de abbratzare sa filosofia de su minimalismu globale: a sos mundiales non bi partetzipamus, gasi non b’at perìgulu de pèrdere in sas fases finale. A pustis de su tràuma matzèdone, custa borta s’ispina nde l’ant istacada sos ùndighi bosnìacos. Oramai sos Balcanos pro sa Figc non sunt prus una regione geogràfica, e sos mundiales americanos de ocannu abbarrant unu Board of Peace claustrofòbicu ue sos biaitos faghent sos osservadores sena pagare mentras chi sos àteros giogant (colunna sonora de sos mundiales s’oramai trumpiana “Gloria”?). Ma su chi ispantat e chi bundat in sas crònacas – isportivas o mancu pagu importat – como est sa dibata a pustis de sa derrota. In prima fila b’agatamus sa segunda càrriga de s’Istadu, Ignazio Benito La Russa. Fatu fatu a Italo Bocchino chi, cun s’agilidade dialètica famada sua, at giai individuadu su culpèvole: sa manca polìtica. Su vate de su patriotismu itàlicu de sos talk e de tik tok narat chi sos giogadores non marcant rete e no otenent cualificatziones ca lis mancat in coro issoro su fogu sagradu de sa natzione, istudadu cun probabilidade manna dae carchi emendamentu in contu de s’armocromia o dae una sensibilidade cosmopolita bundantziosa. A pustis de s’àere faddidu su resurtadu referendàriu (forsis in cherta de l’intzertare comente faghiat su purpu Paul, a bos nd’ammentades?) su “nostru” torrat cun sa chistione pesada carchi mese a como. Chi faghiat a ìere tando e chi faghet a rìere como. Ma nois? Nois inoghe? Si sos unionistas de domo nostra sunt in corrutu, b’at fintzas prus de carchi sardu chi custu giru si nd’at a gosare de sa mancàntzia de marztetas mamelianas e de tricolores peri sas carreras. Passèntzia pro La Russa e pro Bocchino. Siam pronti alla morte? Ma fintzas chi nono.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment