In s’istiu de su 2024 su guvernu Meloni, cun su Ministru Nordio a ghiare sa riforma, aiat cantzelladu su reatu de abusu de ufìtziu. Sa resone decrarada fiat chi sos amministradores biviant cun sa timoria de èssere persighidos dae sa magistradura pro carchi sèberu. E tando, intrare in una mecanismu longu e chi li diat pòdere fàghere pèrdere carriera, dinari e serenidade, mancari no apant fatu nudda. Si podet èssere beru chi onni tantu sunt capitadas acontèssidas gasi, est beru chi fiat fintzas una manera pro compidare sas atziones de sa polìtica. Sa majoria, a s’imbesse de minimare su tempus pro custa genia de reatos o dare carchi traste in prus a sa magistradura pro fàghere prus a lestru, aiat bogadu de su totu su reatu dae su còdighe.
Su 26 de martzu cun 581 votos contra a 21, est colada in su Parlamentu europeu sa diretiva anti-corrutzione, chi òbrigat sos Istados de s’Unione a mìntere in sos sistema giurìdicos issoro leges chi persighint custa ischera de crìmines. Sa punna de s’Europa est de fraigare una retza intre politzia e magistradura de s’Unione, gasi de pòdere intritzare controllos e chircas. Siat sa relatritze de sa diretiva, siat Roberta Metzola, sa Presidente de su Parlamentu europeu, ant decraradu chi sa lege pertocat s’Itàlia. Sa chistione est chi Fratelli d’Italia e sos àteros partidos de su guvernu ant votadu pro sa diretiva. Unu cumportamentu chi non si cumprendet meda.
Su guvernu narat chi sa chistione disinnat lìneas de cumportamentu, punnas ampras, lassende libertade manna e non faeddat de leges. Da s’Europa però denegant custa mirada: s’Itàlia tenet tempus, duos annos prus o mancu, ma non podet torrare borta.
Gabriele Tanda
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment